सङ्घीय संसदअन्तर्गत प्रतिनिधिसभाको बैठक आइतबार बिहान ११ बजेदेखि सुरु भएको छ । आजको बैठकमा विभिन्न महत्त्वपूर्ण विधेयक, आर्थिक प्रस्ताव तथा वार्षिक प्रतिवेदनमाथि छलफल र निर्णय गर्ने कार्यसूची रहेको छ ।
बैठकको प्रारम्भमा सभामुखले राष्ट्रपतिको कार्यालयबाट प्राप्त विधेयक प्रमाणीकरणसम्बन्धी पत्रको व्यहोरा सदनलाई जानकारी गराउने कार्यक्रम रहेको छ । कार्यसूचीअनुसार प्रधानमन्त्री बालेन्द्र साहको तर्फबाट विज्ञान, प्रविधि तथा नवप्रवर्तनमन्त्री महावीर पुनले महालेखा परीक्षकको त्रिसट्ठीऔँ वार्षिक प्रतिवेदन, २०८३ प्रतिनिधिसभामा पेस गर्नेछन् । साथै, सार्वजनिक खरिद (दोस्रो संशोधन) विधेयक, २०८३ प्रस्तुत गर्न अनुमति माग्ने प्रस्ताव पनि उनले सदनमा पेश गर्ने कार्यसूची छ ।
यस्तै, अर्थमन्त्री डा. स्वर्णिम वाग्लेले सम्पत्ति शुद्धीकरण (मनि लाउन्डरिङ) निवारण (तेस्रो संशोधन) विधेयक, २०८३ प्रस्तुत गर्न अनुमति माग्ने प्रस्ताव पेश गर्नेछन् । अनुमति प्राप्त भएपछि उक्त विधेयक पनि सदनमा प्रस्तुत गरिनेछ । भूमि व्यवस्था, सहकारी, सङ्घीय मामिला तथा सामान्य प्रशासनमन्त्री प्रतिभा रावलले सहकारी (पहिलो संशोधन) विधेयक, २०८३ प्रस्तुत गर्न अनुमति माग्ने प्रस्ताव राख्नेछिन् । त्यस्तै, स्वास्थ्य तथा खाद्य स्वच्छतामन्त्री निशा मेहताले स्वास्थ्य विज्ञान प्रतिष्ठानसम्बन्धी केही नेपाल ऐनलाई संशोधन गर्ने विधेयक, २०८३ प्रस्तुत गर्न अनुमति माग्ने प्रस्ताव सदनमा पेश गर्ने कार्यक्रम रहेको छ ।
बैठकमा आर्थिक विधेयक, २०८३ माथि सांसदहरूले दर्ता गराएका संशोधन प्रस्तावमाथि छलफल गरिनेछ। संशोधनमाथि निर्णय भएपछि अर्थमन्त्री डा. स्वर्णिम वाग्लेले आर्थिक विधेयक पारित गरियोस् भन्ने प्रस्ताव प्रस्तुत गर्नेछन् । यसैगरी, राष्ट्र ऋण उठाउने विधेयक, २०८३ माथि दफावार छलफल, संशोधनमाथि निर्णय तथा विधेयक पारित गर्ने प्रस्ताव पनि आजकै बैठकमा प्रस्तुत हुने कार्यसूचीमा समावेश छ । बैठकको अन्त्यमा सभामुखले प्रतिनिधिसभाका पूर्वसदस्य राजेन्द्र खरेलको निधनप्रति श्रद्धाञ्जलि व्यक्त गर्दै शोक प्रस्ताव प्रस्तुत गर्ने कार्यक्रम रहेको छ ।
आजको प्रतिनिधिसभा बैठकलाई आर्थिक, प्रशासनिक तथा कानुनी सुधारसँग सम्बन्धित महत्त्वपूर्ण विधेयकहरूको छलफल र निर्णय हुने भएकाले विशेष चासोका साथ हेरिएको छ ।
