यातायात व्यवस्था कार्यालय पर्साले आर्थिक वर्ष २०८२/८३ मा १ अर्ब ५८ करोड ८८ लाख ६८ हजार ७४६ रुपैयाँ राजस्व सङ्कलन गरेको छ ।
कार्यालयका अनुसार चालु आर्थिक वर्षमा कर राजस्व शीर्षकबाट १ अर्ब १४ करोड ८६ लाख ७३ हजार ४०३ रुपैयाँ र गैरकर राजस्व शीर्षकबाट ४४ करोड १ लाख ९५ हजार ३४३ रुपैयाँ सङ्कलन गरेको छ । तर कार्यालयको तथ्याङ्कअनुसार चालु आर्थिक वर्षको कुल राजस्व सङ्कलन अघिल्लो आर्थिक वर्षको तुलनामा ३ करोड ५१ लाख ७२ हजार ६३८ रुपैयाँले घटेको छ ।
आर्थिक वर्ष २०८१/८२ मा यातायात व्यवस्था कार्यालय पर्साले १ अर्ब ६२ करोड ४० लाख ४१ हजार ३८४ रुपैयाँ राजस्व सङ्कलन गरेको थियो । उक्त वर्ष कर राजस्वबाट १ अर्ब २२ करोड १९ लाख ९ हजार ९ सय ९९ रुपैयाँ र गैरकर राजस्वबाट ४० करोड २१ लाख ३१ हजार ३८५ रुपैयाँ सङ्कलन गरिएको थियो ।
कार्यालयका अनुसार चालु आर्थिक वर्षमा गैरकर राजस्व भने वृद्धि भएको छ । अघिल्लो वर्षको तुलनामा गैरकर राजस्व करिब ३ करोड ८० लाख ६३ हजार ९५८ रुपैयाँले बढेको हो । तर कर राजस्वमा भने करिब ७ करोड ३२ लाख ३६ हजार ५९६ रुपैयाँले कमी आएको छ ।
कर राजस्वमा आएको गिरावटका कारण समग्र राजस्व सङ्कलन घटेको कार्यालयले जनाएको छ । यातायात व्यवस्था कार्यालय पर्साले सवारीसाधन दर्ता, नवीकरण, चालक अनुमतिपत्र, सवारी कर तथा विभिन्न सेवाबाट राजस्व सङ्कलन गर्दै आएको छ । कार्यालयले आगामी दिनमा सेवा प्रवाहलाई थप प्रभावकारी बनाउँदै राजस्व सङ्कलन वृद्धि गर्ने लक्ष्य लिएको जनाएको छ । वार्षिक तथ्याङ्कले कर राजस्व घट्दै गएको र गैरकर राजस्व बढेको देखाएको छ ।
यसले आगामी दिनमा राजस्व व्यवस्थापन तथा सेवा सुधारमा थप ध्यान दिनुपर्ने आवश्यकता देखाएको कार्यालयको भनाइ छ ।
