जिल्ला प्रशासन कार्यालय सप्तरीको नेतृत्वमा गरिएको बजार अनुगमनका क्रममा बरमझियाका पेडा पसल तथा कञ्चनपुर बजार क्षेत्रका मासु पसलको निरीक्षण गरिएको छ ।
उपभोक्ताको स्वास्थ्य र अधिकार संरक्षणलाई ध्यानमा राख्दै खाद्यवस्तुको गुणस्तर, सरसफाइ तथा व्यवसाय सञ्चालनको अवस्थाबारे अनुगमन गरिएको हो । सहायक प्रमुख जिल्ला अधिकारी नरेशकुमार यादवको नेतृत्वमा बिहीबार खटिएको संयुक्त अनुगमन टोलीले बरमझियाका छ वटा पेडा पसलको अनुगमन गरेको थियो ।
अनुगमनका क्रममा एक पेडा पसलमा अवैध रूपमा मदिरा बिक्री भइरहेको पाइएपछि मदिरा जफत गरी आवश्यक कारबाहीका लागि आन्तरिक राजस्व कार्यालय पठाउने तयारी गरिएको सहायक प्रमुख जिल्ला अधिकारी यादवले जानकारी दिएका छन् ।
अनुगमन टोलीमा इलाका प्रहरी कार्यालय कञ्चनपुरका प्रहरी नायब उपरीक्षक राजन रायमाझी, जिल्ला प्रशासन कार्यालयका प्रशासकीय अधिकृत सन्तोष राय, खाद्य प्रविधि तथा गुण नियन्त्रण डिभिजन कार्यालयका खाद्य निरीक्षक राजीन बुढाथोकी तथा घरेलु तथा साना उद्योग कार्यालयका प्रतिनिधि रामअवतार यादव सहभागी थिए ।
टोलीले पेडा पसल सञ्चालकलाई पसल परिसर सफा र व्यवस्थित राख्न, शौचालयको सरसफाइमा ध्यान दिन तथा उपभोक्तालाई गुणस्तरीय र सुरक्षित खाद्य सामग्री उपलब्ध गराउन निर्देशन दिएको छ ।यसैगरी, कञ्चनपुर बजार क्षेत्रमा सञ्चालन भइरहेका खुला तथा अव्यवस्थित मासु पसलको समेत अनुगमन गरिएको छ। मासु पसललाई स्वास्थ्य मापदण्डअनुसार व्यवस्थित र सुरक्षित रूपमा सञ्चालन गर्न व्यवसायीलाई निर्देशन दिइएको छ ।
अनुगमनका क्रममा व्यवसायीलाई गुणस्तरहीन खाद्य सामग्री बिक्री नगर्न, अनिवार्य रूपमा मूल्यसूची राख्न तथा उपभोक्ताको स्वास्थ्य सुरक्षालाई प्राथमिकता दिन सचेत गराइएको थियो । मापदण्ड उल्लङ्घन गर्ने केही व्यवसायीलाई आवश्यक कारबाहीका लागि जिल्ला प्रशासन कार्यालयमा उपस्थित हुन निर्देशनसमेत दिइएको छ ।
सहायक प्रमुख जिल्ला अधिकारी यादवले जनस्वास्थ्य संरक्षण प्रशासनको पहिलो प्राथमिकता रहेको बताउँदै बजार अनुगमनलाई निरन्तरता दिइने जानकारी दिएका छन् । उनले सडकमा दाउरा थुपारेर आवागमनमा अवरोध नगर्न सम्बन्धित पक्षलाई निर्देशन दिएका छन् ।
