काठमाडौं । नेपाल क्रिकेट संघ (क्यान) ले नेपाल प्रिमियर लिग (एनपीएल) २०२६ को मिति सार्वजनिक गरेको छ। क्यानले शनिबार साँझ विज्ञप्ति जारी गर्दै एनपीएलको तेस्रो संस्करण आगामी कात्तिक ९ देखि मंसिर ५ गतेसम्म सञ्चालन हुने जनाएको हो ।
क्यानका सचिव पारस खड्काद्वारा जारी विज्ञप्तिमा प्रतियोगिता सन् २०२६ को अक्टोबर २६ देखि नोभेम्बर २१ सम्म सञ्चालन हुने उल्लेख गरिएको छ ।
एनपीएलका लागि खेलाडी अक्सन यसअघि नै सम्पन्न भइसकेको छ। अहिले सहभागी फ्रेन्चाइज टोलीहरूले विदेशी खेलाडी अनुबन्ध गर्ने प्रक्रिया अघि बढाइरहेका छन् ।
यसपटक प्रतियोगिताको मिति दशैं र तिहारको बीचमा परेकाले तिहारको समयलाई समेत समेट्ने भएको छ। अघिल्ला संस्करणहरू भने तिहारपछि मंसिर महिनामा आयोजना हुँदै आएका थिए ।
प्रतियोगिताको मिति तय भए पनि विस्तृत खेलतालिका भने क्यानले अझै सार्वजनिक गरेको छैन। क्यानले तिहारका दुई दिन बाहेक अधिकांश दिन खेल सञ्चालन गर्ने तयारी गरेको जनाएको छ ।
