वीरगंजस्थित नारायणी अस्पतालबाट चोरी भएको एक दिने नवजात शिशुलाई प्रहरीले करिब १६ घण्टापछि सकुशल उद्धार गरेको छ ।
शिशु चोरीमा संलग्न रहेको आरोपमा प्रहरीले वीरगंज महानगरपालिका–१६, इनर्वाकी सबिना खातुनलाई समेत पक्राउ गरेको छ । जिल्ला प्रहरी कार्यालय पर्साका प्रहरी प्रमुख प्रहरी उपरीक्षक पवन भट्टराईका अनुसार रातभरि खोजी तथा अनुसन्धान अभियान सञ्चालन गरेपछि सोमबार बिहान खातुनलाई नवजात शिशुसहित पक्राउ गरिएको हो ।
प्रहरीका अनुसार प्रारम्भिक बयानका क्रममा खातुनले आफ्नो कुनै सन्तान नभएकाले बच्चा चोरी गरेको बताएकी छन् । यद्यपि, उनले शिशु चोरी गर्नुको वास्तविक कारण, यसमा अन्य व्यक्तिको संलग्नता थियो कि थिएन भन्ने विषयमा प्रहरीले थप अनुसन्धान गरिरहेको जनाएको छ ।
घटनापछि प्रहरीले खातुनलाई शिशुसहित नियन्त्रणमा लिएर जिल्ला प्रहरी कार्यालय पर्सामा ल्याएको थियो । उद्धार गरिएको नवजात शिशुलाई प्रहरीको संरक्षणपछि परिवारकाे जिम्मामा लगाएको छ । शिशुको स्वास्थ्य अवस्था सामान्य रहेको प्रहरीले जनाएको छ ।
हजुरआमासँग बच्चा खेलाउने भन्दै मागेकी थिइन्
प्रहरीका अनुसार सर्लाहीको रामनगर गाउँपालिका–३, बहुअर्वा निवासी रिन्कु देवीले शनिबार राति करिब ११ बजे नारायणी अस्पतालमा शल्यक्रियामार्फत छोरालाई जन्म दिएकी थिइन् ।
एक दिन पनि नपुगेको नवजात शिशु अस्पतालमै आमाको उपचार तथा स्याहारमा थियो । आइतबार अस्पतालमा रहेका शिशुका परिवारका सदस्यसँग एक अपरिचित महिला नजिकिएकी थिइन् । ती महिलाले बच्चालाई खेलाउने भन्दै हजुरआमासँग शिशु मागेकी थिइन् । यसै अस्पतालमा कुचिकारकाे रूपमा कार्यरत बताएकाले परिवारले विश्वास गरेर शिशु उनलाई दिएका थिए । तर, बच्चा हातमा लिएपछि ती महिला अस्पताल परिसरबाट बाहिरिएकी थिइन् ।
केही समयपछि बच्चा लिएर गएकी महिला नफर्किएपछि परिवारले खोजी सुरु गरेको थियो । अस्पताल परिसर तथा आसपास खोज्दा पनि महिला र शिशु नभेटिएपछि परिवारले प्रहरीलाई खबर गरेको थियो ।
१६ घण्टासम्म प्रहरीको खोजी अभियान
नवजात शिशु चोरी भएको सूचना प्राप्त भएपछि प्रहरीले तत्कालै खोजी तथा अनुसन्धान अघि बढाएको थियो । घटनाको संवेदनशीलतालाई मध्यनजर गर्दै प्रहरीले अस्पताल परिसरदेखि वीरगंजका विभिन्न स्थानमा खोजी तीव्र बनाएको थियो ।
प्रहरीले घटनामा संलग्न महिलाको हुलिया तथा घटनासँग सम्बन्धित अन्य विवरणका आधारमा सम्भावित स्थानमा खोजी गरेको थियो । रातभरि गरिएको अनुसन्धानपछि प्रहरीले वीरगंज महानगरपालिका–१६, इनर्वामा शिशुसहित खातुनलाई फेला पारेको हो ।
प्रहरीले शिशुलाई सकुशल उद्धार गरेपछि परिवारलाई समेत राहत मिलेको छ ।
‘सन्तान नभएकाले बच्चा चोरी गरेँ’
पक्राउ परेकी खातुनले प्रारम्भिक बयानमा आफूलाई सन्तान नभएकाले नवजात शिशु चोरी गरेको बताएको प्रहरी प्रमुख भट्टराईले जानकारी दिए ।
तर, सन्तान नभएको कारण मात्र हो कि घटनापछाडि अन्य कुनै उद्देश्य वा व्यक्तिको संलग्नता छ, भन्ने विषयमा प्रहरीले अनुसन्धान गरिरहेको छ । खातुनले अस्पतालसम्म कसरी पुगिन्, शिशु चोरी गर्ने योजना पहिले नै बनाएकी थिइन् कि अचानक यस्तो कदम चालिन् तथा घटनामा अन्य व्यक्ति संलग्न छन् वा छैनन् भन्नेबारे प्रहरीले अनुसन्धान अघि बढाएको छ ।
प्रहरीले घटनाको सम्पूर्ण पाटो अनुसन्धानपछि मात्रै स्पष्ट हुने जनाएको छ ।
परिवारमा खुसी फर्कियो
एक दिनअघि मात्र जन्मिएको छोरा अस्पतालबाटै हराएपछि रिन्कु देवीको परिवारमा ठूलो तनाव उत्पन्न भएको थियो । जन्मिएको खुसीयाली मनाउन नपाउँदै नवजात शिशु हराएपछि परिवारका सदस्यहरू चिन्तित बनेका थिए । प्रहरीले करिब १६ घण्टापछि शिशुलाई सकुशल उद्धार गरेपछि परिवारमा पुनः खुसी फर्किएको छ ।
नवजात शिशु चोरीको यो घटनाले अस्पतालको सुरक्षा व्यवस्थामाथि समेत प्रश्न उठाएको छ । बिरामी तथा कुरुवाको भीडभाड हुने अस्पतालमा अपरिचित व्यक्तिको प्रवेश तथा नवजात शिशुलाई सजिलै बाहिर लैजान सकिने अवस्थाले सुरक्षा व्यवस्थाको कमजोरीसमेत उजागर गरेको छ ।
प्रहरीले पक्राउ परेकी खातुनमाथि थप अनुसन्धान अघि बढाएको छ भने घटनासँग सम्बन्धित अन्य पक्षबारे समेत अनुसन्धान भइरहेको प्रहरीले जनाएको छ ।
सम्बन्धित समाचार
नारायणी अस्पतालबाट एकदिने नवजात शिशुकाे चोरी, सरसफाइ कर्मचारीको भेषमा आएकी महिलाले बच्चा चाेरी गरी फरार (भिडियाे सहित)
नारायणीबाट चोरी भएको एकदिने शिशुसहित महिला पक्राउ
-1788077612.jpg)