मधेश प्रदेशको प्रमुख सरकारी अस्पतालका रूपमा रहेको नारायणी अस्पतालमा सर्पदंशविरुद्ध प्रयोग हुने एन्टिस्नेक भेनम (सर्पदंशविरुद्धको औषधि) अभाव भएको छ ।
अस्पताल प्रशासनले साउन २५ गते सूचना जारी गर्दै सर्पले टोकेपछि उपचारका क्रममा प्रयोग गरिने एन्टिस्नेक भेनम हाल अस्पतालमा उपलब्ध नरहेको जानकारी गराएको हो । अस्पताल प्रशासनका अनुसार तालुक कार्यालयबाट उक्त औषधि उपलब्ध नभएका कारण अस्पतालमा सर्पदंशविरुद्धको औषधि मौज्दात नरहेको हो । औषधि अभाव भएपछि सर्पदंशका बिरामीको उपचारमा समस्या भएको अस्पतालले जनाएको छ ।
एक चिकित्सकका अनुसार पछिल्लो समय नारायणी अस्पतालमा दैनिक १० जनाभन्दा बढी सर्पदंशका बिरामी उपचारका लागि आउने गरेका छन् । तर, आवश्यक औषधि नै उपलब्ध नभएपछि उपचारमा समस्या हुने गरेको उनले बताए ।
उनका अनुसार औषधि अभावका कारण कतिपय सर्पदंशका बिरामीलाई उपचार उपलब्ध गराउन नसकी अन्यत्र पठाउनुपर्ने वा फर्काउनुपर्ने अवस्था सिर्जना भएको छ । सर्पदंशको जोखिम बढ्ने समयमा प्रदेशकै ठूलो सरकारी अस्पतालमा आवश्यक औषधि अभाव हुँदा बिरामी तथा उनीहरूका आफन्त थप समस्यामा परेका छन् ।
अस्पतालमा नियमित रूपमा आउने सर्पदंशका बिरामीको उपचारलाई ध्यानमा राख्दै तत्काल एन्टिस्नेक भेनम उपलब्ध गराउनुपर्ने आवश्यकता देखिएको छ ।
