वीरगञ्जका वरिष्ठ उद्योगपति, समाजसेवी तथा रुङ्टा ग्रुपका अध्यक्ष मुरलीधर रुङ्टाले बाढी तथा पहिरोबाट प्रभावित नागरिकको राहत, उद्धार तथा पुनःस्थापनाका लागि प्रधानमन्त्री दैवी प्रकोप उद्धार कोषमा २ करोड १ लाख रुपैयाँ सहयोग गरेका छन् ।
अर्थमन्त्री स्वर्णिम वाग्लेसँग भेटेर पर्सा क्षेत्र नम्बर २ का सांसद सुशिल कुमार कानुकाे उपस्थितमा उक्त रकमकाे चेक हस्तनान्तरण गरेकाे हाे । रुङ्टा ग्रुपअन्तर्गत सञ्चालित विभिन्न उद्योग तथा प्रतिष्ठानले सामाजिक उत्तरदायित्वअन्तर्गत उक्त रकम सहयोग गरेका हुन् । ग्रुपका सञ्चालक सुरेशकुमार रुङ्टाले २ करोड १ लाख रुपैयाँको चेक प्रधानमन्त्री दैवी प्रकोप उद्धार कोषका लागि हस्तान्तरण गरेका छन् ।
यसअघि शनिबार हरिखेतान बहुमुखी कलेजमा आयोजित कार्यक्रममा कलेज व्यवस्थापन समितिका कोषाध्यक्षसमेत रहेका सुरेशकुमार रुङ्टाले बाढी तथा पहिरो प्रभावित नागरिकको राहतका लागि ३० देखि ४० लाख रुपैयाँसम्म सहयोग गर्ने घोषणा गरेका थिए । तर, घोषणाको भोलिपल्टै रुङ्टा ग्रुपले प्रतिबद्धता जनाइएको रकमभन्दा करिब ६ गुणा बढी अर्थात् २ करोड १ लाख रुपैयाँ सहयोग गरेको हो ।
देशका विभिन्न क्षेत्रमा बाढी तथा पहिरोका कारण ठूलो जनधनको क्षति भइरहेको अवस्थामा प्रभावित परिवारलाई तत्काल राहत, उद्धार तथा पुनःस्थापनामा सहयोग पुगोस् भन्ने उद्देश्यले रकम प्रदान गरिएको रुङ्टा ग्रुपले जनाएको छ ।
विपद्को कठिन परिस्थितिमा निजी क्षेत्रबाट गरिएको यो सहयोगले प्रभावित नागरिकको राहत तथा पुनःस्थापनाका कार्यमा महत्वपूर्ण योगदान पुग्ने अपेक्षा गरिएको छ । सहयोगलाई सामाजिक उत्तरदायित्वसँगै मानवीय सेवाप्रतिको प्रतिबद्धताको उदाहरणका रूपमा समेत लिइएको छ ।
रुङ्टा ग्रुपले उद्योग तथा व्यवसाय सञ्चालनसँगै सामाजिक उत्तरदायित्वलाई प्राथमिकतामा राख्दै विभिन्न विपद्, स्वास्थ्य, शिक्षा तथा सामाजिक सेवाका क्षेत्रमा सहयोग गर्दै आएको जनाएको छ ।
ग्रुपका सञ्चालक सुरेशकुमार रुङ्टाले आगामी दिनमा पनि आवश्यकता र परिस्थितिअनुसार विपद् तथा सामाजिक सेवाका क्षेत्रमा सहयोग र सहकार्यलाई निरन्तरता दिने प्रतिबद्धता व्यक्त गरेका छन् ।
