हरितालिका तीजको पावन अवसर पारेर वीरगंज स्थित ग्लोबल बिजनेस कलेजमा अध्ययनरत विद्यार्थीहरूले विशेष सांस्कृतिक तथा मोडलिङ कार्यक्रमको आयोजना गर्ने भएका छन् ।
ग्लोबल म्याट्रिक्स इभेन्ट्स सँगको सहकार्यमा यही भदौ २७ गते शनिबार कलेज परिसरमै कार्यक्रम सञ्चालन हुन लागेको हो । कक्षा १२ का विद्यार्थी तथा कार्यक्रम संयोजक फरहान अलीका अनुसार तीजको परम्परागत उल्लाससँगै युवा पुस्ताको प्रतिभा प्रस्फुटन गराउने उद्देश्यले कलेजमा पहिलो पटक मोडलिङलाई मुख्य विषय बनाएर प्रस्तुत गर्न लागिएको हो । कार्यक्रममा मोडलिङसँगै गायन तथा नृत्यका विभिन्न सांस्कृतिक प्रस्तुतिहरू रहनेछन् । यसले मोडलिङ क्षेत्रमा भविष्य खोजिरहेका विद्यार्थीहरूलाई नयाँ अवसर र मञ्च प्रदान गर्ने विश्वास लिइएको छ ।
उक्त कार्यक्रम मनोरञ्जनमा मात्र सीमित नभई सामाजिक उत्तरदायित्वमा पनि केन्द्रित रहनेछ । रसुवा लगायतका क्षेत्रमा आएको बाढीका कारण प्रभावित नागरिकहरूको सहयोगार्थ कार्यक्रममार्फत आर्थिक संकलन गरिने आयोजकले जनाएको छ । उपस्थित अतिथि तथा दर्शकहरूबाट संकलित रकम बाढीपीडितलाई राहत स्वरूप उपलब्ध गराइनेछ ।
विगत १० दिनदेखि तीव्र तयारी भइरहेको यो कार्यक्रम भदौ २७ गते दिउँसो १ बजेदेखि साँझ ६ बजेसम्म सञ्चालन हुने आयोजक विद्यार्थी समूहले जनाएको छ । करिब १ लाखदेखि १ लाख ५० हजार रुपैयाँको लागत अनुमान गरिएको यस कार्यक्रममा कलेजका शिक्षक, कर्मचारी तथा विद्यार्थीहरू केन्द्रीत सहभागिता रहनेछ ।
संस्कृति, प्रतिभा र अभिव्यक्तिलाई उत्सवका रूपमा मनाउने मूल नारासहित आयोजना हुन लागेको कार्यक्रमको आधिकारिक मिडिया पार्टनरका रूपमा स्थानीय लोकप्रिय अनलाइन पोर्टल ‘वीरगञ्जसिटी डटकम’ जोडिएको छ ।
