वीरगंज महानगरपालिका–२५ का जग्गाधनीहरूले ड्राइपोर्टका लागि अधिग्रहण गरिएको जग्गाको मुआब्जा तथा भौतिक संरचनाको क्षतिपूर्ति उपलब्ध गराउन माग गर्दै ज्ञापनपत्र बुझाएका छन्।
मुआब्जा संघर्ष समितिका अध्यक्ष अशोक कुमार चौधरीको नेतृत्वमा प्रभावित जग्गाधनीहरूले सुक्खा बन्दरगाह भन्सार कार्यालय, वीरगंजका प्रमुख भन्सार अधिकृतमार्फत जिल्ला प्रशासन कार्यालय पर्सामा ज्ञापनपत्र बुझाएका हुन्।
ड्राइपोर्टका लागि जग्गा अधिग्रहण गरिए पनि लामो समयदेखि मुआब्जा तथा क्षतिपूर्ति नपाएको भन्दै प्रभावित जग्गाधनीहरूले समस्या समाधानका लागि सम्बन्धित निकायको ध्यानाकर्षण गराएका छन्।
समितिका अध्यक्ष चौधरीद्वारा हस्ताक्षरित ज्ञापनपत्रमा स्वबासी घडेरी जग्गाको मुआब्जा भुक्तानी गर्न तथा कर वा मालपोत नलाग्ने घरटहरा लगायत सम्पूर्ण भौतिक संरचनाको मुआब्जा र क्षतिपूर्ति निर्धारण गरी वितरण गर्न माग गरिएको छ।
ज्ञापनपत्रमा जग्गाको नापजाँच, अभिलेख तथा मुआब्जा निर्धारण प्रक्रियामा देखिएका समस्याका कारण स्थानीय जग्गाधनीहरू लामो समयदेखि प्रभावित हुँदै आएको उल्लेख गरिएको छ। समस्या समाधानमा ढिलाइ हुँदा प्रभावित परिवार आर्थिक तथा सामाजिक समस्यामा परेको समितिले बताएको छ।
समितिले प्रभावित जग्गाधनीलाई मुआब्जा उपलब्ध गराउँदै बाँकी प्रक्रिया तत्काल अघि बढाउन सरकारसँग माग गरेको छ।
ज्ञापनपत्र प्रधानमन्त्री, अर्थमन्त्री, भूमि व्यवस्था, सहकारी तथा गरिबी निवारणमन्त्री तथा जिल्ला प्रशासन कार्यालय पर्सालगायत सम्बन्धित निकायमा बुझाइएको समितिले जनाएको छ।
