वीरगंज महानगरपालिकाका वडा नम्बर १७, २५ र २६ मा लामो समयदेखि अवरुद्ध रहेको पानी निकास खुलाइएको छ ।
महानगरपालिकाले डोजर प्रयोग गरी नाला सफाइ तथा आवश्यक स्थानमा नाला निर्माण गरेर पानीको निकास सहज बनाएको हो ।
पानीको उचित निकास नहुँदा वर्षायाममा वडा नम्बर १७, २५ र २६ अन्तर्गत सुगौली, अलौलगायत आसपासका बस्ती तथा खेतबारी क्षेत्रमा लामो समयसम्म पानी जम्ने गरेको थियो। जलजमावका कारण स्थानीयको आवतजावतमा समस्या हुनुका साथै खेतीपातीसमेत प्रभावित हुँदै आएको थियो ।
लामो समयसम्म पानी जमिरहँदा लामखुट्टेको प्रकोप बढ्ने, दुर्गन्ध फैलिने तथा स्वास्थ्यसम्बन्धी समस्या देखिने गरेको स्थानीयको गुनासो थियो ।
पानी निकास खुलाउने काम सुरु भएपछि स्थानीयवासीले आगामी वर्षायाममा जलजमावको समस्या कम हुने अपेक्षा गरेका छन् ।
महानगरपालिकाका अनुसार अवरुद्ध रहेका पानी निकासका संरचना सफाइ तथा आवश्यक व्यवस्थापन गरी पानीको सहज बहाव सुनिश्चित गर्ने काम गरिएको हो ।
