वीरगंज बचाऊँ सङ्घर्ष समिति र वीरगञ्ज युवा तथा व्यापारी सडक पीडित सङ्घर्ष समितिले पर्साका प्रमुख जिल्ला अधिकारी (प्रजिअ) गणेश अर्यालमार्फत प्रधानमन्त्रीलाई सडक विस्तार रोक्न ज्ञापन पत्र बुझाएका छन् ।
गण्डक–घण्टाघर–मितेरी पुल खण्डको सडकलाई २५/२५ मिटर फराकिलो बनाउने योजना परिमार्जन गर्न माग गर्दै ज्ञापन पत्र बुझाइएको हो ।
सडक विस्तार भएमा सयौँ परिवार सुकुम्वासीमा परिणत हुने, हजारौँ व्यवसाय चौपट हुने, र ऐतिहासिक सम्पदा नष्ट हुने खतरा रहेको सङ्घर्ष समितिको तर्क छ । ज्ञापन पत्रमा रानी सती मन्दिर, महावीर मन्दिर, बिर्ता माई मन्दिर, छठ पोखरी, त्रिजुद्ध हाइस्कूल लगायतका संरचनाहरू मासिने जनाउँदै विकल्प खोज्न आग्रह गरेको हाे ।
सङ्घर्ष समितिले गण्डक-भन्सार जोड्ने १ सय १० फिटको बाइपास सडक र नेपाल रेल्वेको ६६ फिटको सडक प्रयोग गरी यातायात सहज बनाउन सकिने सुझाव दिएको छ । सङ्घर्ष समितिका संयोजक तथा वडाध्यक्ष जवाहर प्रसाद गुप्ताले सार्वजनिक सडक ऐन २०३१ अनुसार सहरी मार्ग कायम गरी विस्थापन रोक्न माग गरे ।
स्थानीयले पर्साका प्रमुख जिल्ला अधिकारी गणेश अर्याललार्इ ज्ञापन पत्र बुझाउदै माग पूरा नभए आन्दोलन चर्काउने चेतावनी दिएका छन् ।
