चितवन । नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले नयाँ वर्षसँगै सरकार परिवर्तनको संकेत गरेका छन् । आइतबार चितवनमा सञ्चारकर्मीहरूसँग कुराकानी गर्दै उनले वर्तमान सरकार दीर्घकालीन रूपमा अगाडि जान कठिन रहेको बताएका हुन् ।
प्रचण्डले भने, “परिस्थिति यस्तो बन्दैछ कि यो सरकार धेरै अगाडि जान सहज छैन भन्ने कुरा देखिइराख्या छ । त्यसकारण कुनैपनि सम्भावना छ ।” उनले नयाँ वर्षले केही न केही निकास अवश्य ल्याउने विश्वास व्यक्त गरे।
उनको भनाइ अनुसार, जनआक्रोश सरकारप्रति बढ्दो छ र सरकारमा रहेका दलहरू समेत सडकमा देखिन थालेका छन्। यसै सन्दर्भमा उनले केही दिन अघि एक टेलिभिजन अन्तर्वार्तामा नेपाली कांग्रेसको नेतृत्वमा नयाँ सरकार बन्ने संकेत दिएका थिए, तर त्यसबारे विस्तृत विवरण भने खुलाएनन् ।
प्रचण्डले घटनाक्रमको आधारमा देश नयाँ दिशा तर्फ जानसक्ने उल्लेख गर्दै भने, “पछिल्लोपटक घटनाक्रमहरु नयाँ भए । केही नयाँ अनुभवसहित भनेको हो मैले । मलाई लाग्छ, त्यही दिशातिर देश जान्छ ।”
यद्यपि, माओवादी केन्द्रले तत्काल सरकारमा जानेबारे औपचारिक निर्णय नगरेको उनले स्पष्ट पारे ।
