रुसले बिहीबार राति युक्रेनको राजधानी कीभमाथि हालसम्मकै भीषण ड्रोन र मिसाइल आक्रमण गरेको छ। राष्ट्रपति भ्लादिमिर पुटिनले अमेरिकी पूर्वराष्ट्रपति डोनाल्ड ट्रम्पको युद्ध अन्त्यसम्बन्धी प्रस्ताव अस्वीकार गरेपछि केही घण्टामै रुसले यो आक्रमण थाल्यो ।
- रुसी आक्रमणका तथ्यहरू:
- कुल प्रहार: ५५० वटा ड्रोन र ११ वटा मिसाइल
- अवरोधमा चुकेका ड्रोन: कम्तीमा ७२ वटा, जसले कीभमा विस्फोट गराए
- घाइते: २३ जना
- क्षति: विद्यालय, भवन, कारमा आगलागी, रेल पूर्वाधारमा क्षति
- कूटनीतिक असर: पोल्याण्डको दूतावाससमेत क्षतिग्रस्त
- रातभर ८ घण्टा साइरन बज्यो
कीभमा रातभरि आकाशमा ड्रोन र ती नष्ट गर्न प्रयोग गरिएको रक्षा प्रणालीको आवाज गुञ्जिरहेको थियो। नागरिकहरू आक्रमणको त्रासमा रातभर जाग्राम बसे। बिहानसम्म शहरका विभिन्न भागमा धुवाँको मुस्लो देखिएको थियो ।
जेलेन्स्कीको कडा प्रतिक्रिया
युक्रेनी राष्ट्रपति भोलोदिमिर जेलेन्स्कीले आक्रमणलाई “युद्धको निर्लज्जता” भन्दै भर्त्सना गरेका छन् । उनले टेलिग्राममार्फत लेखे, “पुटिन–ट्रम्प संवादपछि फेरि पुष्टि भयो– रुस शान्ति चाहँदैन।” साथै, उनले अन्तर्राष्ट्रिय समुदाय र अमेरिकालाई मस्कोमाथि थप दबाब र प्रतिबन्धको आह्वान गरेका छन् ।
पोल्याण्डको कूटनीतिक चिन्ता
पोल्याण्डका विदेश मन्त्री राडोस्लाव सिकोरस्कीले कीभस्थित आफ्नो देशको दूतावास आक्रमणमा क्षतिग्रस्त भएको पुष्टि गरेका छन्, जसले आक्रमणको अन्तर्राष्ट्रिय असर देखाएको छ ।
रुसी क्षेत्रमै युक्रेनी जवाफी आक्रमण
रुसी अधिकारीहरूका अनुसार युक्रेनी ड्रोन आक्रमणमा दक्षिणी रोस्तोभ क्षेत्रमा एक महिलाको मृत्यु भएको छ।
ट्रम्प–पुटिन संवाद असफल
ट्रम्प र पुटिनबीच बिहीबार टेलिफोन संवाद भएको थियो । ट्रम्पले संवादलाई “निराशाजनक” भन्दै पुटिनले शान्तिको प्रस्ताव अस्वीकार गरेको आरोप लगाएका छन् । सन् २०२२ को फेब्रुअरीदेखि जारी रुस–युक्रेन युद्धले अहिले तीन वर्ष पार गरिसकेको छ। पछिल्ला घटनाहरूले युद्ध अन्त्यको आशामा झन् अनिश्चितता थपेका छन् ।
