वीरगंज । पछिल्लो समय जापानिज इन्सेफ्लाइटिस (JE) सङ्क्रमण बढ्दै गएपछि वीरगंज महानगरपालिकाले पशुपन्छी फार्म क्षेत्रमा विशेष अनुगमन तथा जनचेतनामूलक अभियान सञ्चालन गरेको छ ।
महानगरको वडा नं १९ बरवा र वडा नं २२ मनियारीस्थित सुँगुर तथा बङ्गुर फार्ममा गरिएको अनुगमनका क्रममा किसान तथा स्थानीयलाई रोगको जोखिमबारे सचेत गराइएको हो । अभियानमा कृषि तथा पशुपन्छी व्यवसाय प्रवर्द्धन शाखा, वन तथा वातावरण शाखा र महानगर प्रहरी बलको संयुक्त टोली सहभागी थियो ।
सुँगुरपालन क्षेत्रमा रोगको सम्भावना बढी हुने भएकाले सरसफाइमा निरन्तर ध्यान दिन, पानी जम्न नदिन, मलमूत्रको उचित व्यवस्थापन गर्न तथा लामखुट्टे नियन्त्रणका उपाय अपनाउन किसानलाई आग्रह गरिएको थियो । साथै फार्मभित्र बाहिरी व्यक्तिको आवागमन नियन्त्रण गर्ने, पशुपन्छीलाई स्वच्छ वातावरण उपलब्ध गराउने र दैनिक सरसफाइलाई प्राथमिकतामा राख्ने विषयमा समेत जोड दिइएको हो ।
जोखिमपूर्ण क्षेत्रमा रहेका दलित बस्तीहरूमा समेत जनचेतना कार्यक्रम सञ्चालन गरिएको छ । सो क्रममा स्थानीयलाई सामूहिक सरसफाइमा सहभागी हुन र लामखुट्टे नियन्त्रणमा प्रत्यक्ष सरोकारवाला बन्न प्रेरित गरिएको थियो ।
महानगर प्रमुख राजेशमान सिंहले रोग नियन्त्रणलाई उच्च प्राथमिकतामा राखिएको उल्लेख गर्दै नियमित रूपमा औषधी छर्किने र फार्मस्तरमा सरसफाइ अनुगमनलाई तीव्रता दिइएको जानकारी दिए ।
अनुगमन टोलीमा पशु चिकित्सक डा. सुदिपकुमार शर्मा, वातावरण शाखाका प्रकाश ऐर र महानगर प्रहरी निरीक्षक हरि भुसाल सहभागी थिए ।
भिडियाे सामाग्री
