मधेस प्रदेशस्थित राजमार्ग सुरक्षा तथा ट्राफिक व्यवस्थापन कार्यालय, बारा पथलैयाका एसपी राजकुमार सिलवालमाथि छानबिन सुरु भएको छ ।
मधेस प्रहरीले एसपी सिलवाल आचरण विपरीतको गतिविधि गरेको आशंकामा छानबिन थालिएको डिआइजी उमाप्रसाद चतुर्वेदीले जानकारी दिए । उनका अनुसार सिलवालविरुद्ध विभिन्न गुनासोहरू उजुरीका रूपमा आएका कारण छानबिन प्रक्रिया अघि बढाइएको हो ।
छानबिनका लागि प्रदेश प्रहरीले तीनवटा समिति गठन गरेको छ । ती समितीको नेतृत्व एसएसपी भीम दाहाल, एसएसपी कमल थापा र एसपी नारायण रञ्जितकारले गरेका छन् ।
मधेस प्रदेश प्रहरीका अनुसार एसपी सिलवालविरुद्ध प्रहरी प्रधान कार्यालय र प्रदेश प्रहरी कार्यालयमा ३५ थान उजुरी परेको छ । डिआइजी चतुर्वेदीले भने, ‘३५ थान उजुरी आएको छ, त्यसबारे समितिले छानबिन गरिरहेको छ ।’
सिलवालमाथि मापसे गरेर सवारी चलाउने चालकलाई जरिवाना गरेर छाड्नुपर्नेमा रातभर नियन्त्रणमा राख्ने, रकम असुल्ने, साथै चोरीका गाडी नियन्त्रणमा लिएर भन्सार बुझाउनुपर्नेमा आफूखुसी प्रयोग गर्ने जस्ता आरोप उजुरीमार्फत आएका छन् ।
