काठमाडौँ । बिहार विधानसभा चुनावमा यसपालि पनि नरेन्द्र मोदी–नितिश कुमार नेतृत्वको गठबन्धन बलियो रूपमा अघि बढेको देखिएको छ । ताजा परिणामअनुसार २४३ मध्ये करिब २०० सिटमा गठबन्धनका उम्मेदवारहरू अग्रस्थितिमा छन् ।
यसैबीच चर्चित गायिका मैथिली ठाकुर बिहारको सबैभन्दा कान्छी विधायक बन्ने almost निश्चित भएको छ । २५ वर्षीया ठाकुर अलीनगर निर्वाचन क्षेत्रबाट भारतीय जनता पार्टी (भाजपा) की उम्मेदवार हुन् ।
गणनाको पछिल्लो विवरणअनुसार ठाकुरले ४९ हजार मत प्राप्त गर्दै आरजेडीका उम्मेदवार विनोद मिश्रालाई पछि पारेकी छन्। मिश्राले ४२ हजार मत ल्याएका छन् ।
बिहानैदेखि निरन्तर अग्रता बनाइराएकी ठाकुरले आफ्नो जितको दाबी समेत गरेकी छन् । उनले आफू विजयी भएपछि “अलिनगर अब ‘सीतानगर’ बन्नेछ” भनेर अभिव्यक्ति दिएकी छन् ।
मैथिली ठाकुर विभिन्न टेलिभिजन गायन प्रतियोगिताबाट भारतभर चर्चामा आएकी गायिका हुन् । अलीनगर क्षेत्रमा यसअघि भाजपा कहिल्यै नजितेकोमा यो पटक ठाकुरले पहिलो जित दिलाउने देखिएको छ ।
यसअघि बिहारमा सबैभन्दा कान्छा विधायक २००५ मा निर्वाचित स्वतन्त्र उम्मेदवार तौसिफ आलम थिए । त्यसैगरी आरजेडी नेता लालु यादवका छोरा तेजस्वी यादव २०१५ मा २६ वर्षको उमेरमा विधायक निर्वाचित भएका थिए ।
