सडक डिभिजन कार्यालय मकवानपुरले महेन्द्र राजमार्ग र त्रिभुवन राजपथ मिचेर निर्माण गरिएका अवैध संरचना हटाउन १५ दिने अल्टिमेटम दिएको छ ।
शुक्रबार सार्वजनिक सूचना जारी गर्दै डिभिजनले हेटौँडा उप–महानगरपालिका–५ मा पर्ने रातोमाटे–बुद्धचोक–राप्ति पुल तथा बुद्धचोक–सामरी पुलबीचको खण्डमा पक्की तथा अस्थायी संरचना अवैधानिक रूपमा खडा गरिएकाले तुरुन्त हटाउन आग्रह गरेको हो ।
यसअघि पनि पटक–पटक सूचना निकालिए पनि संरचना धनीले नटेरेपछि पुनः कडा निर्णयसहित अल्टिमेटम जारी गरिएको सडक डिभिजनले जनाएको छ । उल्टै संरचना धनीहरूले क्षतिपूर्ति माग गर्दै सर्वोच्च अदालतमा रिट दर्ता गरेका थिए । तर २०७८ पुस १९ र २०८० असार १० का दुईवटा रिटमाथि सर्वोच्च अदालतले क्रमशः खारेज गरिसकेकाले ती संरचना पूर्ण रूपमा अवैध ठहर भइसकेका छन् ।
अदालतकै आदेशले अवैध सावित भइसकेका संरचना ४ वर्षसम्म पनि नहटाइएकाले बाध्य भएर कडा कदम चाल्नुपरेको सडक डिभिजनले बताएको छ । "
डिभिजनले दिएको १५ दिने समयसिमा भित्र संरचना नहटाइएमा बल प्रयोग गरी हटाउने, साथै हटाउने क्रममा लाग्ने सम्पूर्ण खर्च सम्बन्धित व्यक्ति तथा संस्थाबाट असुल–उपर गरिने चेतावनीसमेत दिएको छ ।
डिभिजनले सार्वजनिक सडक ऐन, २०३१ को दफा उल्लेख गर्दै महेन्द्र राजमार्ग तथा त्रिभुवन राजपथका दायाँ–बायाँ २५–२५ मिटर क्षेत्रमा संरचना निर्माण गर्न पूर्ण निषेध गरिएको स्मरण गराएको छ । डिभिजनका अनुसार स्वीकृति बिना सडक मिचेर निर्माण गरिएका संरचना सडक सुरक्षा, यातायात व्यवस्थापन र सर्वसाधारणको आवागमनमै बाधक बनेका छन् ।
स्थानीय रूपमा पनि सडक मिचाइका कारण ट्राफिक व्यवस्थापन प्रभावित हुँदै आएको छ भने विस्तारका कार्यसमेत अघि बढ्न नसकेको डिभिजनले जनाएको छ ।
