सिरहालाई जोड्ने कमला नदीको पुल अब तीन महिनाभित्र सञ्चालनमा आउने भएको छ ।
भौतिक पूर्वाधार तथा यातायातमन्त्री कुलमान घिसिङले पुल निर्माणस्थलको निरीक्षण गर्दै स्थानीयले वर्षौंदेखि भोग्दै आएको दैनिक जोखिम, असुरक्षा र असुविधा प्रत्यक्ष अवलोकन गरेपछि निर्माण कम्पनीले छोटो अवधिमै काम सक्ने प्रतिज्ञा व्यक्त गरेका छन् ।
तराई–मधेसको “लाइफ लाइन” मानिने हुलाकी राजमार्गअन्तर्गत पर्ने यो पुल विसं २०६८ सालमा तीन वर्षमै निर्माण सम्पन्न गर्ने गरी सम्झौता भएको थियो । तर १४ वर्ष बितिसक्दा पनि पुल अपूरै रहँदा स्थानीयहरूले रोगी बोकेर नदी तर्नेदेखि विद्यालय, बजार र कार्यालय जानसम्म कठिनाइ भोग्दै आएका छन् । निरीक्षणका क्रममा मन्त्री कुलमान घिसिङले आफू पनि डुङ्गा चढेर नदी पार गर्दै स्थानीयको वास्तविक कठिनाइको प्रत्यक्ष अनुभव लिएकाे बताएका छन् ।
सामाजिक सञ्जालमार्फत उनले लेखेअनुसार २०६८ जेठमा सञ्चालन भएको पुल निर्माण कार्य आजसम्म पनि पूरा हुन नसक्दा स्थानीयले झेल्नुपरेको पीडाले आफ्नो मन “भारी भएको” उनले उल्लेख गरेका छन् । स्थानीयको आवतजावत सहज बनाउन तत्कालका लागि अस्थायी संरचना वा वैकल्पिक उपायबारे विस्तृत छलफल भएको र मन्त्रालयले आवश्यक प्रक्रिया अघि बढाउने जानकारी उनले दिएका छन् ।
पुल निर्माणको जिम्मेवारी लिएको लुम्बिनी बिल्डर्सका सञ्चालक विष्णुप्रसाद शर्माले मन्त्रीसमक्ष तीन महिनाभित्र निर्माण सम्पूर्ण रूपमा पूरा गरी सञ्चालनमा ल्याउने प्रतिबद्धता जनाएका छन् । यसअघि यो पुल निर्माणको ठेक्का पप्पु कन्स्ट्रक्सनले पाएको थियो । तीन वर्षभित्र निर्माण सक्नुपर्ने संरचना लामो समयसम्म अलपत्र पारिएपछि पप्पु कन्स्ट्रक्सन कालोसूचीमा पर्यो र बाँकी काम लुम्बिनी बिल्डर्सले निरन्तरता दिइरहेको छ ।
पुल निर्माणको इतिहास हेर्दा दशकौँ लामो ढिलाइ, नौ पटकसम्म म्याद थप, बढ्दो लागत, प्राकृतिक विपत्तिको क्षति र प्राविधिक समस्या क्रमसँगै जोडिएको पाइन्छ । विशेषगरी २०७८ असार १७ गतेको बाढीले पुलका दुई जग भासिँएपछि ठूलो अवरोध आएको हाे । हाल ४६९ मिटर लम्बाइ रहेको पुलको ८३ प्रतिशत भौतिक र ८२ प्रतिशत वित्तीय प्रगति भइसकेको छ, तर म्याद भने पुनः–पुनः थपिँदै आएको छ, अहिले नवौँ म्याद थप प्रक्रिया चलिरहेको छ ।
स्थलगत निरीक्षणमा मन्त्री कुलमान घिसिङसँगै युवा तथा खेलकुदमन्त्री बब्लु गुप्ता, मन्त्रालयका सचिव केशवकुमार शर्मा, सडक विभागका महानिर्देशक विजय जैशी, हुलाकी राजमार्ग निर्देशनालय योजना कार्यालय जनकपुरका प्रमुख कृष्णकुमार महतो, जेनजी अभियन्ता सुदन गुरुङ, शिव यादव, पुरषोत्तम यादवसहितको टोली सहभागी रहेका थिए । टोलीले पुलको विद्यमान संरचना, जोखिम, क्षति तथा अवरोधका कारण विस्तृत अध्ययन गरेको थियो ।
कमला नदीको यो पुल मधेस प्रदेशका लागि अत्यन्तै महत्वपूर्ण मानिन्छ । यो पुल सञ्चालनमा आएपछि धनुषा–सिरहाबीचको यातायात झनै सहज हुने, आपतकालीन सेवा सुधारिने, स्थानीय व्यापार–व्यवसाय विस्तार हुने, कृषि उत्पादन बजारसम्म छिटो पुग्ने र हुलाकी राजमार्गको प्रभावकारिता बढ्ने अपेक्षा गरिएको छ ।
मन्त्रालयले अबदेखि नियमित अनुगमन, आवश्यक समन्वय र कार्यान्वयन प्रक्रियामा कडाइ गर्दै पुललाई निर्धारित समयभित्र सम्पन्न गराउने प्रतिबद्धता व्यक्त गरेको छ ।
