काठमाडौँ । साविक उपविजेता सुदूरपश्चिम रोयल्सले नेपाल प्रिमियर लिग (एनपिएल) मा आफ्नो अपराजित यात्रालाई निरन्तरता दिएको छ । त्रिभुवन विश्वविद्यालय अन्तर्राष्ट्रिय क्रिकेट मैदानमा बिहीबार भएको खेलमा सुदूरपश्चिमले लुम्बिनी लायन्सलाई सात विकेटले पराजित गर्दै लगातार चौथो जीत दर्ता गर्दै प्रतियोगितामा अपराजित रहने एकमात्र टोली बनेको छ ।
एक सय ४४ रनको लक्ष्य पछ्याएको सुदूरपश्चिमले १८.२ ओभरमा तीन विकेट गुमाउँदै एक सय ४५ रन जोड्दै सहज जीत हात पा-यो ।
ओपनर विनोद भण्डारीको दमदार प्रदर्शन
सुदूरपश्चिमका लागि ओपनर विनोद भण्डारीले अविजित अर्धशतकीय इनिङ्स खेले। उनले ४९ बलमा पाँच चौका र चार छक्काको मद्दतमा ६९ रन प्रहार गर्दै जितको आधार तयार गरे ।
यस्तै, आरिफ शेखले ३९ रन र क्रिस लेनले १६ रनको योगदान दिए ।
लुम्बिनीको कमजोर ब्याटिङ प्रदर्शन
टस हारेर पहिले ब्याटिङ गरेको लुम्बिनी लायन्स १९.४ ओभरमै सबै विकेट गुमाउँदै १ सय ४३ रनमै समेटियो ।
कप्तान रोहित पौडेलले ३६ बलमा तीन चौका प्रहार गर्दै ३५ रन बनाए।
यस्तै, दीलिप नाथले ३१ रन, डी’आर्की सर्ट र सुमित महर्जनले समान १८–१८ रन, तथा गुलवदिन नईवले ११ रन जोडे ।
सुदूरपश्चिमका बलरको प्रभावकारी खेल
बलिङतर्फ सुदूरपश्चिमका अविनाश बोहरा र हर्मित सिंह उत्कृष्ट रहे। दुबैले तीन–तीन विकेट लिए ।
हेमन्त धामीले दुई तथा स्कट कग्लेइजनले एक विकेट हात पारे ।
सुदूरपश्चिम रोयल्सले यस जीतसँगै एनपिएलमा शीर्ष स्थानमा आफ्नो पकड झनै मजबुत बनाएको छ ।
