१०औँ राष्ट्रिय खेलकुद प्रतियोगिता–२०८३ का लागि मधेश प्रदेशस्तरीय तेक्वान्दो छनोट प्रतियोगिता सम्पन्न भएको छ । प्रतियोगितामा पर्सा जिल्लाका खेलाडीहरूले उत्कृष्ट प्रदर्शन गर्दै पुरुषतर्फ पाँच र महिलातर्फ एक गरी कुल ६ खेलाडीले प्रथम स्थान हासिल गरेका छन् ।
‘खेली मधेश, जिती मधेश’ भन्ने नारासहित बाराको निजगढमा मंसिर ४ र ५ गते सञ्चालन भएको प्रतियोगिता मधेश खेलकुद परिषद्, जनकपुरधामको आयोजना तथा मधेश प्रदेश तेक्वान्दो संघको सहकार्यमा सम्पन्न भएको हो ।
प्रतियोगिताअन्तर्गत पुरुषतर्फ विभिन्न तौल समूहमा पर्साका खेलाडीहरूले उत्कृष्ट प्रदर्शन गर्दै प्रथम स्थान हासिल गरेका छन् । जसअनुसार ५४ केजी तौल समूहमा आसिफ हुसेन अन्सारी, ६८ केजीमा मोहम्मद शोएब अख्तर, ७४ केजीमा विक्रान्त डंगोल, ८० केजीमुनि इमरान शेख र ८७ केजीमा रोहन पटेल प्रथम भएका छन् ।
त्यस्तै, पुरुषतर्फ ८७ केजीभन्दा माथिको तौल समूहमा दीपेश मानन्धरले दोस्रो स्थान हासिल गरेका छन् ।
महिलातर्फ ६३ केजी तौल समूहमा नाजिया हसन सिद्दिकीले प्रथम स्थान हासिल गरेकी छन् भने ५७ केजी तौल समूहमा कुकी मुखियाले तेस्रो स्थान प्राप्त गरेकी छन् ।
प्रतियोगितामा उत्कृष्ट प्रदर्शन गर्दै छनोट भएका खेलाडीहरूले आगामी १०औँ राष्ट्रिय खेलकुद प्रतियोगितामा मधेश प्रदेशको प्रतिनिधित्व गर्ने अवसर पाउनेछन्।
प्रशिक्षक नजिर हुसेन अन्सारीको प्रशिक्षणमा सहभागी खेलाडीहरूले हासिल गरेको सफलतालाई पर्सा जिल्लाको खेलकुद क्षेत्रका लागि महत्वपूर्ण उपलब्धिका रूपमा हेरिएको छ ।
यस सफलताले पर्सा जिल्लामा तेक्वान्दो खेलप्रतिको आकर्षण र खेलाडीहरूको सम्भावनालाई थप उजागर गरेको छ । प्रदेशस्तरीय छनोट प्रतियोगिताले नयाँ प्रतिभाको पहिचान गर्नुका साथै राष्ट्रियस्तरमा मधेश प्रदेशको उपस्थिति बलियो बनाउन सहयोग पुग्ने अपेक्षा गरिएको छ ।
पर्साका खेलाडीहरूले हासिल गरेको उपलब्धिले आगामी राष्ट्रिय प्रतियोगितामा समेत उत्कृष्ट प्रदर्शन गर्ने अपेक्षा बढाएको छ ।