चन्द्रपुर नगरपालिकामा सरसफाइ विभागमा कार्यरत सफाईकर्मीहरूको स्वास्थ्य सुरक्षालाई ध्यानमा राख्दै निःशुल्क हेपाटाइटिस विरुद्धको भ्याक्सिन लगाइएकाे छ ।
पूर्व–पश्चिम राजमार्गसँग जोडिएको महत्वपूर्ण नगर चन्द्रपुरमा फोहरमैला व्यवस्थापनका क्रममा उच्च स्वास्थ्य जोखिममा रहने ३२ जना सफाईकर्मीलाई शुक्रबार बिहान चन्द्रपुर हस्पिटलको पहलमा खोप लगाइएको हो । चन्द्रपुर हस्पिटलका संस्थापक डा. सुभाष चौधरीकाे पहलमा आयोजित खोप कार्यक्रममा दैनिक रूपमा प्रदूषण, संक्रमण र जैविक फोहोरसँग प्रत्यक्ष सम्पर्कमा रहने सफाईकर्मीहरूलाई निशुल्क भ्याक्सिन उपलब्ध गराइएको हस्पिटलले जनाएको छ । हेपाटाइटिस रोगको दीर्घकालीन जोखिमलाई कम गर्न यो खोप सुरक्षित, प्रभावकारी सुरक्षा प्रदान गर्ने चिकित्सकहरूले बताएका छन् ।
विश्वभर करिब ३२ करोड ५० लाख मानिस हेपाटाइटिसबाट प्रभावित रहेको तथ्य प्रस्तुत गर्दै डा. सुभाष चौधरीले संक्रमितमध्ये १० मध्ये ९ जनाले प्रारम्भिक चरण मै रोगबारे जानकारी नपाइने भएकाले रोग जटिल बन्दै जाने बताए । उनका अनुसार हरेक वर्ष १३ लाखभन्दा बढी व्यक्तिको ज्यान लिने हेपाटाइटिस कलेजो क्यान्सरको प्रमुख कारणका रूपमा पनि रहेको छ ।
चन्द्रपुर हस्पिटल प्रा.लि.ले यसअघि पनि समुदायमै आधारित विभिन्न स्वास्थ्य तथा सामाजिक कार्यक्रम सञ्चालन गर्दै आएको छ ।
कार्यक्रममा चन्द्रपुर नगरपालिकाका मेयर सञ्जय कुमार काफ्ले, डा. सुभाष चौधरी, डा. सुजन शर्मा, डा. अमित चौधरी, डा. दीपक साहका साथै नगरका कर्मचारी तथा स्थानीयहरूको उपस्थिति थियो ।
