काठमाडौं । लुम्बिनी लायन्सले सिद्धार्थ बैंक नेपाल प्रिमियर लिग (एनपीएल) मा दोस्रो जित हात पारेको छ । शनिबार कीर्तिपुरस्थित टीयू अन्तर्राष्ट्रिय क्रिकेट मैदानमा सम्पन्न खेलमा लुम्बिनीले पोखरा एभेन्जर्सलाई ३ विकेटले पराजित गर्दै महत्वपूर्ण विजय दर्ता गर्यो ।
पोखराले दिएको १५१ रनको लक्ष्य लुम्बिनीले १९.४ ओभरमा ७ विकेट गुमाउँदै पूरा गर्यो । अन्तिम ओभरमा १० रन आवश्यक हुँदा सन्दीप जोराले लगातार दुई चौका प्रहार गर्दै लुम्बिनीलाई रोमाञ्चक जित दिलाए ।
यस जितसँगै लुम्बिनीले लगातार आएका ३ हारको शृङ्खला तोडेको छ। पाँच खेलबाट ४ अंक जोडेको लुम्बिनी अंकतालिकामा पाँचौँ स्थानमा उक्लिएको छ ।
लुम्बिनीका लागि कप्तान रोहित पौडेलले सर्वाधिक ४० रन, एनपीएलमा डेब्यु गरेका श्रीलंकाली ब्याटर निरोशन डिकवेलाले ३७ रन तथा सन्दीप जोराले अविजित २५ रन योगदान गरे ।
बलिङतर्फ पोखराका विपिन खत्री, म्याट टेलर र सागर ढकालले समान २/२ विकेट लिए ।
यसअघि टस हारेर ब्याटिङ थालेको पोखराले उत्कृष्ट पुनरागमन गर्दै १५० रनको प्रतिस्पर्धात्मक स्कोर बनाएको थियो । कमजोर शुरुवात भए पनि विकेटकिपर ब्याटर एडम रोसिङ्गटन र जिमी नीशमले उत्कृष्ट साझेदारी गरे ।
रोसिङ्गटनले ६३ बलमा ७ चौका र ५ छक्का सहित सर्वाधिक ८१ रन जुटाए। नीशमले पनि आक्रामक ब्याटिङ गर्दै ३२ बलमा ५१ अविजित रन (३ चौका, ३ छक्का) बनाए। दुवैले पाँचौँ विकेटका लागि ९२ रनको महत्वपूर्ण साझेदारी गरे ।
लुम्बिनीका बलर शेर मल्ल र तिलक भण्डारीले समान २/२ विकेट, जबकि गुलबादिन नइबले १ विकेट लिए।
