सीमावर्ती क्षेत्रमा तस्कर समूहको बढ्दो प्रभाव र प्रहरी व्यवस्थापनको कमजोरी उजागर गर्ने गम्भीर घटना बारामा सार्वजनिक भएको छ । तस्करी नियन्त्रणका क्रममा नेपाल प्रहरीका एक अधिकृतको हातबाटै सरकारी पेस्तोल लुटेर तस्कर समूह फरार भएको तथ्य बाहिर आएको हो ।
चिन्ताजनक पक्ष के छ भने घटना भएको करिब एक सातासम्म प्रहरी संगठनले यसबारे कुनै जानकारी सार्वजनिक गरेको थिएन ।
जिल्लाको इलाका प्रहरी कार्यालय कबहीमा कार्यरत प्रहरी सहायक निरीक्षक (सई) सोनुकुमार मिश्र ड्युटीमा रहँदा पुस ११ गते शुक्रबार साँझ उक्त घटना भएको प्रहरी स्रोतले जनाएको छ । स्रोतका अनुसार तस्करी नियन्त्रणका क्रममा सई मिश्रले बोकेको नाइन एमएम पेस्तोल निकालेर तस्कर समूहलाई नियन्त्रणमा लिन खोज्दा उनीहरूले प्रतिरोध गर्दै हतियार नै खोसेर फरार भएका थिए ।
स्थानीय स्रोतका अनुसार सई मिश्र आफ्नो कार्यक्षेत्रमा कमजोर अधिकृतका रूपमा चिनिँदै आएका थिए । यसबारे जानकारी हुँदाहुँदै पनि जिल्ला प्रहरी कार्यालयले समयमै जिम्मेवारी हेरफेर नगरेको आरोप उठेको छ। यही कमजोरीको फाइदा उठाउँदै तस्कर समूहले प्रहरीलाई चुनौती दिएको बताइन्छ ।
घटना भएको सात दिन बितिसक्दा पनि लुटिएको पेस्तोल बरामद हुन नसकेको र संलग्न तस्करहरू पक्राउ नपरेकोप्रति सर्वसाधारणमा गम्भीर चिन्ता बढेको छ । प्रहरीको हतियार तस्करको हातमा पुगेको आशंकाले सीमावर्ती क्षेत्रको सुरक्षा अवस्था थप संवेदनशील बनेको छ ।
घटना सार्वजनिक भएपछि मात्र मधेस प्रदेश प्रहरी कार्यालय सक्रिय भएको देखिएको छ । बिहीबार एसपी भेषराज रिजालको संयोजकत्वमा छानविन समिति गठन गरिएको छ ।
बारा प्रहरी प्रमुख एसपी नरेन्द्र कुँवरले पेस्तोल हराएको पुष्टि गर्दै घटनाको यथार्थ पत्ता लगाउन छानविन प्रक्रिया अघि बढाइएको जानकारी दिए । उनका अनुसार गस्तीका क्रममा पेस्तोल हराएको विवरण आएको छ र छानविन समिति सक्रिय रूपमा काम गरिरहेको छ । “के भएको हो, छिट्टै स्पष्ट हुन्छ,” उनले बताएका छन् ।
यस घटनाले सीमा क्षेत्रमा प्रहरीको तयारी, निगरानी प्रणाली र जवाफदेहितामाथि गम्भीर प्रश्न खडा गरेको छ ।
