राष्ट्रिय स्वतन्त्र पार्टी (रास्वपा) ले आगामी निर्वाचनलाई लक्षित गर्दै कर्णाली प्रदेशको राजधानी सुर्खेत बाट आफ्नो १०० बुँदे चुनावी वाचा पत्र सार्वजनिक गरेको छ ।
‘स्थिति बसाल्ने सङ्कल्प’ नाम दिइएको २२ पृष्ठीय दस्तावेजमार्फत पार्टीले राज्य संयन्त्र सुधार र नागरिकका आधारभूत समस्या समाधानलाई प्राथमिकतामा राखेको जनाएको छ । वाचा पत्रको तेस्रो बुँदामा २०४६ सालदेखि महत्वपूर्ण सार्वजनिक पदमा रहेका व्यक्तिहरूको सम्पत्ति पारदर्शी रूपमा छानबिन गर्ने उल्लेख छ । अवैध रूपमा आर्जन गरिएको सम्पत्ति जफत गरी राष्ट्रियकरण गर्ने नीति अघि सारिएको छ ।
पाँचौँ बुँदामा कुनै पनि प्रकारका भातृ संगठन निर्माण नगर्ने तथा राज्यका निकायलाई दलीय हस्तक्षेपबाट मुक्त राख्ने प्रतिबद्धता जनाइएको छ । सरकारी सेवालाई झन्झटमुक्त बनाउन नवौँ बुँदामा परम्परागत टिप्पणी प्रणालीको अन्त्य गर्दै फाइलको सम्पूर्ण प्रक्रिया अनलाइन डिजिटल प्रणालीमार्फत निश्चित समयसीमाभित्र सम्पन्न गर्ने व्यवस्था लागू गर्ने उल्लेख गरिएको छ । प्रशासनिक खर्च कटौती र कार्यक्षमता वृद्धिका लागि १७औँ बुँदामा संघीय मन्त्रालयको संख्या १४ मा सीमित गर्ने प्रस्ताव राखिएको छ । साथै विज्ञतामा आधारित ‘विज्ञ मन्त्री’को अवधारणा कार्यान्वयन गर्ने प्रतिबद्धता व्यक्त गरिएको छ ।
आर्थिक सुधारअन्तर्गत २२औँ बुँदामा पारिवारिक भारका आधारमा आयकरको सीमा पुनरावलोकन गर्ने उल्लेख छ । ३१औँ बुँदामा सरकार गठन भएको १०० दिनभित्र सहकारीका साना बचतकर्ताहरूको रकम फिर्ता गर्ने प्रतिबद्धता जनाइएको छ। ३२औँ बुँदामा मिटरब्याज तथा अनुचित लेनदेनलाई आर्थिक अपराधका रूपमा परिभाषित गरी दोषीमाथि कडा कारबाही गर्ने योजना समेटिएको छ ।
शिक्षा क्षेत्रमा ६१औँ बुँदामा विश्वविद्यालय र विद्यालयलाई दलीय राजनीतिक गतिविधिबाट मुक्त राख्ने उल्लेख छ । प्रत्येक प्रदेशमा कम्तीमा एक अत्याधुनिक नमुना समावेशी विद्यालय स्थापना गर्ने योजना अघि सारिएको छ ।
त्यसैगरी, राष्ट्रिय रणनीतिक उद्योग घोषणा गरी आगामी १० वर्षमा पाँच लाख प्रत्यक्ष रोजगारी सिर्जना गर्ने लक्ष्य राखिएको छ । विदेशमा रहेका नेपालीलाई विकासको साझेदार बनाउन ९९औँ बुँदामा उनीहरूको मताधिकार सुनिश्चित गर्ने तथा लगानीका लागि डलर खाता सञ्चालनमा सहजता प्रदान गर्ने व्यवस्था प्रस्ताव गरिएको छ ।
रास्वपाले परम्परागत राजनीतिक कार्यशैलीलाई चुनौती दिँदै सुशासन, पारदर्शिता र परिणाममुखी शासन प्रणालीमार्फत मुलुकमा स्थायित्व र सुधार ल्याउने दाबी गरेको छ ।
