राष्ट्रिय स्वतन्त्र पार्टी (रास्वपा) का सभापति रवि लामिछाने केही दिनयता अस्वस्थ भएका छन्। चुनावी दौडधुपका कारण उनी अहिले बूढानीलकण्ठस्थित आफ्नै निवासमा आराम गरिरहेका छन्। उनका सचिवालयका अनुसार लामिछानेलाई ज्वरो र पिसाब संक्रमण (युरिन इन्फेक्सन) देखिएको छ। चिकित्सकले उनलाई अझै एक–दुई दिन आराम गर्न सल्लाह दिएका छन्।
लामिछानेको स्वास्थ्य अवस्थाका कारण पार्टीका शीर्ष नेताहरूबीचका पछिल्ला छलफलहरू पनि उनका निवासमै भइरहेको स्रोतले बताएको छ। बिहीबार रास्वपाका वरिष्ठ नेता बालेन्द्र शाह (बालेन) लामिछानेलाई भेट्न निवासमै पुगेका थिए। निर्वाचन परिणाम सार्वजनिक भएपछि यो उनीहरूबीचको पहिलो व्यक्तिगत भेट रहेको छ। स्रोतका अनुसार दुई नेताबीच वान–टु–वान छलफल भएको थियो।
फागुन २१ गते सम्पन्न प्रतिनिधिसभा निर्वाचनमा करिब दुई तिहाइ मत ल्याएपछि रास्वपाभित्र सरकार गठनको विषयमा छलफल चलिरहेको छ। चुनावअघि नै पार्टीले वरिष्ठ नेता बालेनलाई भावी प्रधानमन्त्रीको रूपमा अघि सारेको थियो।
यसैबीच पार्टी कार्यालय वनस्थलीस्थित घण्टीघरमा नेता–कार्यकर्ताहरू भेटघाटका लागि पुगेका छन्। त्यहाँ उपसभापति डीपी अर्यालले नवनिर्वाचित सांसद र नेता–कार्यकर्तासँग भेटघाट गर्दै आन्तरिक समन्वय गरिरहेका छन्।
अहिले समानुपातिक सांसद चयन, संसदीय दलको नेतृत्व प्रक्रिया मिलाउने तथा सम्भावित मन्त्रिपरिषद् गठनबारे आन्तरिक गृहकार्य भइरहेको छ। निर्वाचन आयोगले दलहरूलाई तीन दिनभित्र समानुपातिक तर्फ पठाउने उम्मेदवारहरूको सूची बुझाउन पत्र पठाएपछि रास्वपाले उक्त प्रक्रिया टुंग्याउने तयारी गरेको छ।
स्रोतका अनुसार, पार्टीको विधानले बालेनलाई सहज रूपमा प्रधानमन्त्री बनाउन नदिने भएकाले त्यसलाई मिलाउने विषयमा पनि आन्तरिक छलफल भइरहेको छ।
-Recovered@1x_1-1792306880.jpg){kind=logo}
-Recovered@1x_1-1792308710.jpg){kind=logo}
