एसियाली फुटबल महासंघ (एएफसी) ले मलेसियाले नेपाल र भियतनामविरुद्ध हासिल गरेको जितको नतिजा उल्ट्याएको छ । मलेसियाले आफ्नो राष्ट्रिय टोलीमा खेल्न अयोग्य सात जना खेलाडीलाई नक्कली कागजातका आधारमा मैदान उतारेको पुष्टि भएपछि एएफसीले नेपाल र भियतनामलाई ३–० को प्राविधिक जित प्रदान गरेको हो ।
यस निर्णयसँगै मलेसिया सन् २०२७ को एएफसी एसियन कप छनोटबाट आधिकारिक रूपमा बाहिरिएको छ । मलेसिया फुटबल संघले विदेशी खेलाडीहरूलाई मलेसियाको नागरिक बनाउन फिफामा झुटा कागजात पेस गरेको एएफसीको ठहर छ ।
गत वर्ष सम्पन्न छनोट खेलमा नेपाल मलेसियासँग २–० ले पराजित भएको थियो। तर एएफसीको अनुशासन समितिले उक्त नतिजा खारेज गर्दै नेपाललाई ३–० को जित प्रदान गरेको हो। यसबाट नेपालले महत्वपूर्ण तीन अंक प्राप्त गरे पनि अर्को चरणमा पुग्न भने पर्याप्त भएन ।
नेपालले मलेसियासँगको एक खेलमा प्राविधिक जित पाए पनि अन्य खेलहरूको नतिजा भने अनुकूल रहेन । नेपालले भियतनामसँग भएका दुवै खेलमा हार व्यहोरेको थियो । साथै मलेसियासँगको अर्को खेल र लाओससँगको हारका कारण नेपाल तेस्रो चरणबाट गणितीय रूपमा बाहिरिसकेको छ ।
हाल समूह ‘एफ’ को अंकतालिकामा भियतनाम १५ अंकसहित शीर्ष स्थानमा रहँदै छनोट भइसकेको छ । दोस्रो स्थानमा रहेको मलेसियाको ९ अंक भए पनि नतिजा उल्टिएपछि टोली बाहिरिएको हो । नतिजा संशोधनपछि नेपाल ३ अंकसहित तेस्रो स्थानमा उक्लिएको छ भने लाओस नेपालविरुद्ध प्राप्त जितका तीन अंकसहित चौथो स्थानमा छ । समूहबाट मलेसियासँगै नेपाल र लाओस पनि बाहिरिएका छन् ।
नेपालले अब समूह चरणको अन्तिम खेल प्रतिष्ठाका लागि मात्र खेल्नेछ। नेपालले आगामी चैत १७ गते लाओससँग प्रतिस्पर्धा गर्ने तालिका रहेको छ। उक्त खेलपछि नेपालको एसियन कप छनोट यात्रा समाप्त हुनेछ ।
उता, खेलकुदसम्बन्धी सर्वोच्च निकाय कोर्ट अफ आर्बिट्रेसन फर स्पोर्ट (कास) ले सात जना खेलाडी — फ्याकुन्डो गार्सिया, ग्याब्रियल पाल्मेरो, रोड्रिगो होल्गाडो, इमानोल माचुका, जोआओ फिग्युरेरो, हेक्टर हेभेल र जोन इराजाबाललाई दोषी ठहर गरेको छ । उनीहरूले मलेसियाको नागरिकता प्राप्त गर्न र राष्ट्रिय टोलीबाट खेल्न कागजात कीर्ते गरेको पुष्टि भएपछि उनीहरूमाथि १२ महिनाको प्रतिबन्ध लगाइएको छ ।
साथै, मलेसियाली फुटबल संघलाई ५० हजार अमेरिकी डलर जरिवाना पनि गरिएको छ ।
यसअघि मलेसिया १६ वर्षपछि सन् २०२३ मा सम्पन्न एसियन कपमा छनोट भएको थियो । तर पछिल्लो जालसाजी प्रकरणले मलेसियाली फुटबलमा ठूलो धक्का पुगेको छ । मलेसियाली फुटबल संघले भने नागरिकता कानुनी प्रक्रियाबाटै प्रदान गरिएको दाबी गर्दै निर्णयविरुद्ध थप कानुनी परामर्श लिने जनाएको छ ।
