वीरगञ्ज महानगरपालिका वडा नम्बर १३ स्थित स्काइलाइन मल किर्ते जग्गामा बनाइएको खुलासा भएको छ ।
चार वटा प्लटमा बनाइएको स्काइलाइन मल किर्ते जग्गामा भएको तथ्य उजागर भएको हो । अरुको जग्गालाई ०४६ सालको नयाँ नापीबाट आफ्नो नाममा किर्ते गरी जग्गाधनीको पूर्जा लिएको खुलासा भएसंगै एसबीआइ र कुमारी बैंकको डेढ सय करोड लोन डुब्ने खतरा बढेको छ । चार वटा कित्ता भएको जग्गाधनी मध्येका एक निखत प्रवीण अन्सारीले मालपोतमा आफ्नो नाममा जग्गा हाल साबिक गर्न निवेदन दिएपछि यस्तो खुलासा भएको हो । मालपोतमा प्रवीणले यही बैशाख ३ गते उच्च अदालतको परमादेश अनुसार जग्गा हाल साबिक गरिदिन निवेदन दिइन् । उनको निवेदन दर्ता भएसंगै सुरु भयो, जग्गाको खोजविन ।
यहीक्रममा मालपोतले नापी कार्यालयलाई जग्गाको वास्तविकता बारे बुझ्न पत्र लेख्यो, जुन पत्रको जवाफले मालपोत मात्रै झस्किएन, प्रवीण पनि होस गुमाइन । नापी कार्यालयको त्यो पत्रमा मालपोतबाट सोधिएको जग्गा अरुको नाममा पास रहेको जवाफ आएको थियो । त्यति मात्रै होइन उक्त जग्गामा बैंकले ठूलो लगानी गरी मलसमेत बनाएको जानकारी निखतलाई आयो । त्यसपछि आफ्नो जग्गा फिर्ता लिने निधो गर्दै प्रवीणले सबै कागजातसहित आफ्नो जग्गामा अरुलाई कसरी ऋण दिएको भन्दै बीरगन्ज महानगरपालिका निवासी निखत प्रवीणले नेपाल एसबीआइ बैंक र कुमारी बैंकको केन्द्रीय कार्यालयमा निवेदन दिइन । यही १९ असारमा उनले दुइवटै बैंकको केन्द्रिय कार्यालयमा निवेदन दर्ता गराएकी हुन । उनले निवेदनमा बीरगन्ज साबिकको श्रीपुर ९ (ख) कित्ता नम्बर १०५ को ३ कट्ठा जग्गा आफ्नो नाममा हालसम्म कायम रहेको लेखेकी छन् ।
निवेदनमा उनले भनेकी छन्, ‘तपाइको बैंकले ऋण दिएको जग्गा मेरो नाममा छ, हाल साबिक गर्न मैले पटकपटक निवेदन दिएको छु । उच्च अदालतले मेरो नाममा हाल साबिक गर्न परमादेश पनि दिइसकेको छ ।’ अदालतको आदेशानुसार उक्त जग्गा हाल साबिकको प्रक्रिया रहेको उनी निवेदनमा लेखेकी छन् । दुइवटै बैंकमा दिइएको निवेदनमा उच्च अदालतबाट भएको आदेशको व्यहोरा उल्लेख गर्दै अरुको जग्गामा किर्ते गरी बनाइएको भवनमा दिइएको ऋण सम्बन्धित व्यक्तिसंग असुल गर्न उनको माग छ ।
स्काइलाइन मलको नाममा विक्री भएको मालपोत नयाँ लालपुर्जामा देखिन्छ । यद्यपी, महानगरले मालपोतको नाममा लेखेको पत्रमा उक्त जग्गा आदर्शनगर विकास समितिभित्र पर्ने प्लटको नरहेको प्रष्टरुपमा भनेको छ । महानगरले ०७२ साल ३ असारमा मालपोतको नाममा लागत उतार सम्बन्धमा एक पत्र लेख्दै साबिक श्रीपुर वडा नम्बर ९ मा पर्ने कित्ता नम्बर १०५ को क्षेत्रफल ०–३–० कट्ठा जग्गा २०२९ सालको अश्विन २ गतेको तत्कालीन श्री ५ सरकारद्वारा प्रकाशित भएको नेपाल राजपत्रमा उल्लेखित जग्गा अधिग्रणमा नपरी उल्लेखित राजपत्रमा प्रकाशित नभएको जानकारी गराएको छ । तर जालझेल गरेर यही जग्गा आदर्शनगर विकास समितिको अधिग्रहणमा परेको भन्दै प्लट नम्बर ५४ नम्बर कित्ता, ८४१ नम्बरलाई ५५ नम्बर कित्ता, ८४२ लाई ५६ बनाएर लालपुर्जा बनाइएको देखिन्छ । यसैगरी अर्को कित्ता नम्बर ७० र ५८ को जग्गा स्काइलाइन मलले हड्पेको देखिएको छ । जग्गाधनीका नाती प्रदीप केडियाले आफ्नो जग्गामा किर्ते गरी स्काइलाइन मल बनाइएको बताए ।
उनले आफ्नो बज्यैको नाममा रहेको जग्गा आफू विक्री नगर्दा पनि अरुको नाममा गएको देखेर छक्क परेको बताए । आफ्नो जग्गा केही व्यक्तिबाट हड्पिएको जानकारी पाएपछि आफूहरु कानुनी प्रक्रिया सुरु गरिसकेको जनाए । यसरी किर्ते गरी हडपिएको जग्गाको कसको हो भन्ने सोधिएको प्रश्नमा स्काइलाइन मलका ‘डाइरेक्टर’ आकृति अग्रवालले आफू यो बारेमा आफूलाई केही जानकारी नभएको बताइन । उनले आफू तत्काल यो बारेमा कुनै प्रतिक्रिया दिने पक्षमा नरहेको सुनाइन ।
