अन्तरिम सरकारका गृहमन्त्री ओमप्रकाश अर्याल ले आफ्नो कार्यकालको प्रमुख उपलब्धि निष्पक्ष निर्वाचन सम्पन्न गर्नु रहेको बताएका छन् ।
जेन–जी जनआन्दोलनपछि उत्पन्न असामान्य परिस्थितिमा गठन भएको सरकारको मुख्य म्याण्डेट नै स्वच्छ, निष्पक्ष, भयरहित र रक्तपातविहीन निर्वाचन गराउनु रहेको उनले उल्लेख गरे । सो लक्ष्य हासिल गर्न सफल भएकोमा उनले गर्व व्यक्त गरे ।
गृहमन्त्री अर्यालका अनुसार आफ्नो कार्यकालमा जनआन्दोलनका मागहरू सम्बोधन गर्न विशेष प्राथमिकता दिइएको थियो । आन्दोलनका क्रममा ज्यान गुमाएका ४२ जना नागरिक र ३ जना प्रहरीलाई शहीद घोषणा गरिएको तथा ७२९ जना घाइतेलाई प्रतिव्यक्ति ३५ हजार रुपैयाँ राहत वितरण गरिएको जानकारी उनले दिए। गम्भीर घाइतेहरूका लागि मासिक जीविकोपार्जन भत्ता तथा शहीद परिवारका लागि जीवन निर्वाह भत्ताको व्यवस्था कार्यान्वयनको चरणमा रहेको उनले बताए ।
छोटो अवधिमा गृह मन्त्रालयले नीतिगत तथा कानुनी क्षेत्रमा महत्वपूर्ण प्रगति गरेको दाबी गर्दै उनले ६ महिनामा करिब दुई दर्जन कानुन तर्जुमा तथा संशोधन गरिएको जानकारी दिए । यसअन्तर्गत ५ वटा अध्यादेश, ७ वटा नियमावली संशोधन तथा विभिन्न कार्यविधिहरू समावेश छन् ।
आन्दोलनका क्रममा क्षतिग्रस्त ४६५ वटा सरकारी कार्यालय पुनर्निर्माण गरी सेवा प्रवाह पूर्ण रूपमा सुचारु गरिएको पनि उनले उल्लेख गरे ।
सामूहिक नेतृत्व र व्यावसायिकता प्राथमिकतामा
आफूलाई व्यावसायिक व्यक्ति भन्दै अर्यालले गृह प्रशासनमा सामूहिक नेतृत्वको अभ्यास बढाइएको बताए । सुरक्षा निकाय र कर्मचारीतन्त्रको मनोबल उच्च बनाउन ‘बटम–अप’ दृष्टिकोण अपनाइएको उनको भनाइ छ ।
‘व्यावसायिकतालाई केन्द्रमा राख्दा जनशक्तिको मर्यादा बढ्छ र राम्रो कार्य वातावरणले अपेक्षित नतिजा दिन्छ,’ उनले भने ।
गलत भाष्यविरुद्ध उभिने प्रतिबद्धता
गृहमन्त्री अर्यालले राष्ट्रसेवक र सुरक्षा निकायको मनोबल गिराउने ‘गलत भाष्य’ विरुद्ध उभिनुपर्नेमा जोड दिए । पदमा नरहे पनि सत्यका आधारमा संस्थाको पक्षमा बोल्ने प्रतिबद्धता उनले व्यक्त गरे ।
