अमृत झा नामका उदयपुरका ३३ वर्षीय नेपाली नागरिकको मुद्दा हाल इरानी अदालत मा विचाराधीन रहेको छ ।
परराष्ट्र मन्त्रालय का प्रवक्ता लोकबहादुर पौडेल क्षेत्री का अनुसार झासम्बन्धी सम्पूर्ण प्रक्रिया अब अदालतको निर्णयमा निर्भर भएको छ ।
झा यूएईस्थित ब्ल्याक सी मरिन एलएलसी को स्वामित्वमा रहेको पानीजहाजमा चालकदल सदस्यका रूपमा कार्यरत थिए। उनलाई इस्लामिक इरान रेभलुसनरी गार्ड ले ‘स्ट्रेट अफ होर्मुज’ नजिकैबाट नियन्त्रणमा लिएको थियो । उनीसँगै केही भारतीय नागरिक पनि पक्राउ परेका थिए ।
प्रवक्ता क्षेत्रीका अनुसार यो घटना व्यक्तिगत नभई जहाजसँग सम्बन्धित विषय हो। जहाज इरानको सामुद्रिक क्षेत्रमा प्रवेश गरेको र अनुमति नपाइने सामग्री रहेको आशंकामा नियन्त्रणमा लिइएको अपुष्ट जानकारी आएको उनले बताए। यद्यपि, वास्तविक कारण अदालतले नै टुंग्याउनेछ ।
झाको अवस्थाबारे सरकारले नियमित जानकारी लिइरहेको छ। इरानका लागि नेपालको अनररी कन्सुल जनरल साहराम शान्तीई मार्फत एक इरानी वकिलको व्यवस्था गरिएको छ, जसले नेपाली र भारतीय नागरिकको पक्षमा बहस गरिरहेका छन् ।
वकिलले झालाई भेटेर उनको अवस्था सामान्य र सुरक्षित रहेको जानकारी दिएको मन्त्रालयले जनाएको छ । ‘खानपिन लगायत सबै आधारभूत सुविधा ठीक छ, उहाँ सकुशल हुनुहुन्छ,’ प्रवक्ता क्षेत्रीले बताए ।
मुद्दाको फैसला ढिलाइ हुनुमा इरानको वर्तमान परिस्थिति प्रमुख कारण रहेको बताइएको छ । त्यहाँको युद्धजन्य अवस्था, नौरोज पर्व, भौतिक पूर्वाधारमा क्षति तथा आवागमनमा अवरोधका कारण अदालती प्रक्रिया प्रभावित भएको देखिन्छ ।
झालाई कस्तो सजाय हुन्छ भन्नेबारे भने अहिले नै केही भन्न नसकिने मन्त्रालयको भनाइ छ । अपराधको प्रकृतिका आधारमा अदालतले निर्णय गर्ने भएकाले पूर्वानुमान गर्न नसकिने प्रवक्ता क्षेत्रीले स्पष्ट पारे ।
नेपाल सरकारका तर्फबाट कूटनीतिक माध्यममार्फत निरन्तर पहल भइरहेको जनाउँदै उनले अदालतको अन्तिम निर्णयपछि मात्र आगामी प्रक्रिया अगाडि बढ्ने बताए ।
