अघिल्लो दिन १०५ अंकले घटेको सेयर बजार सोमबार भने ८३.३३ अंकले बढेको छ । यस वृद्धिसँगै बजार परिसूचक नेप्से २७६० बिन्दुमा पुगेको छ ।
कारोबारका क्रममा दिउँसो २:३३ बजे नेप्से ९८ अंकसम्म बढेर २७७५ बिन्दुमा पुगेको थियो, जुन आजको उच्चतम विन्दु रह्यो ।
अघिल्लो दिन बजार उच्च अंकले घटेपछि अर्थमन्त्री स्वर्णिम वाग्लेले स्टक ब्रोकर एसोसिएसन अफ नेपालका पदाधिकारीसँग भेटवार्ता गर्दै बजारमा अनावश्यक त्रास फैलिएको बताएका थिए । उनले आगामी बजेट रुपान्तरणकारी हुने तथा बजार पारदर्शिताका लागि सरकार प्रतिबद्ध रहेको आश्वासन दिएका थिए ।
त्यस्तै, आर्थिक पत्रकार समाज (सेजन)का पदाधिकारीसँगको भेटमा पनि उनले घोषणापत्रअनुसार बजार सुधारको काम हुने र नेप्से पुनर्संरचनाको प्रक्रिया अघि बढिरहेको जानकारी दिएका थिए । अर्थमन्त्रीको यस आश्वासनले बजारमा सकारात्मक प्रभाव परेको देखिन्छ ।
आज कारोबार रकम केही घटेको छ । अघिल्लो दिन १२ अर्ब ३८ करोड रुपैयाँ बराबरको कारोबार भएकोमा आज १० अर्ब ९२ करोड रुपैयाँमा सीमित रह्यो ।
आज २६४ कम्पनीको शेयर मूल्य बढेको छ भने ४ कम्पनीको घटेको र १ कम्पनीको स्थिर रहेको छ । सबै समूहका सूचक हरियाली देखिएका छन् ।
हाइड्रोपावर समूह सबैभन्दा धेरै ४.५९ प्रतिशतले बढेको छ । त्यस्तै फाइनान्स ४.०३, विकास बैंक ३.६३, बैंकिङ ३.१८, होटल तथा पर्यटन ३.२४, लगानी ३.३३, जीवन बीमा २.६६, उत्पादन तथा प्रशोधन १.५३, माइक्रोफाइनान्स २.४३, निर्जीवन बीमा २.९४, अन्य २.३६ तथा व्यापार समूह २.४० प्रतिशतले बढेका छन् ।
आज ८ कम्पनीको शेयर मूल्य १० प्रतिशतले बढेको छ। ती कम्पनीमा उपकार लघुवित्त, रिडी पावर, नेसनल हाइड्रोपावर, भुजुङ हाइड्रोपावर, सुपरखुदी हाइड्रोपावर, रिजलाइन इनर्जी, सूर्यकुण्ड हाइड्रो इलेक्ट्रिक र होटल फरेस्ट इन रहेका छन् ।
त्यस्तै, कर्पोरेट डेभलपमेन्ट बैंकको ९.८८, शिवश्री हाइड्रोपावरको ९.५५ तथा हिमाल दोलखा हाइड्रोपावरको ९.१८ प्रतिशतले मूल्य बढेको छ।
अघिल्लो दिन १० प्रतिशतले बढेको रिलायन्स स्पिनिङ मिल्समा भने आज बिक्री चाप देखिएको छ र कम्पनीको शेयर मूल्य १.६० प्रतिशतले घटेको छ ।
आज सर्वाधिक कारोबार भएका कम्पनीहरूमा रिलायन्स स्पिनिङ मिल्स, हिमालयन रिइन्स्योरेन्स, एनआरएन इन्फ्रास्ट्रक्चर, अपी पावर र रिडी पावर रहेका छन् ।
