अन्तिम ओभरसम्म तनावपूर्ण बनेको फाइनल खेलमा सर्लाही जिल्ला क्रिकेट संघले चितवनको भरतपुर क्रिकेट एकेडेमीलाई १ रनले पराजित गर्दै तेस्रो संस्करणको जीतपुरसिमरा क्रिकेट कपको उपाधि आफ्नो नाममा गरेको छ ।
जीतपुरसिमरा उपमहानगरपालिका–४ औराहस्थित सेज क्रिकेट मैदानमा शनिबार सम्पन्न फाइनल खेलमा भरतपुर क्रिकेट एकेडेमी (चितवन) लाई १ रनले पराजित गर्दै सर्लाहीले उपाधि जितेको हो ।
सर्लाहीले प्रस्तुत गरेको १६१ रनको लक्ष्य पछ्याएको चितवनले निर्धारित २० ओभरमा ५ विकेट गुमाउँदै १५९ रन मात्रै बनाउन सक्यो । जितका लागि अन्तिम ६ बलमा १२ रन आवश्यक रहेको अवस्थामा चितवनले १० रन मात्रै जोड्न सक्यो ।
चितवनका प्रतिक श्रेष्ठले ४७ रनको उत्कृष्ट इनिङ खेले पनि टोलीलाई जित दिलाउन सकेनन् । उनले ३७ बलमा ४ छक्का र १ चौका प्रहार गरे । रोहन झाले २३ बलमा ४ छक्का र ३ चौकासहित ४३ रन बनाए भने रिजन काफ्लेले ३१ र आर्या महतोले १६ रन जोडे ।
सर्लाहीका राहुल महतोले २ विकेट लिए भने चक्रधार यादव र अभय यादवले १–१ विकेट लिए ।
यसअघि टस हारेर ब्याटिङ गरेको सर्लाहीले अली हसनको अर्धशतकको मद्दतमा ५ विकेट गुमाउँदै १६० रन बनाएको थियो । अली हसनले ४८ बलमा २ छक्का र ५ चौकासहित ५३ रन बनाए । जितेश मण्डलले १४ बलमा ४ छक्का र २ चौकासहित ३८ रनको विष्फोटक इनिङ खेले । ओपनर आरिफ राजाले २८ रन र परिमार्जन यादवले २० रनको योगदान दिए ।
चितवनका दीपेश श्रेष्ठले २ विकेट लिए भने सुमित अर्याल, प्रतिक श्रेष्ठ र सुमित शर्माले १–१ विकेट लिए ।
उपाधि विजेता सर्लाहीले रु २ लाख र उपविजेता चितवनले रु १ लाख नगद पुरस्कार प्राप्त गरेका छन् । प्रतियोगिताको सर्वोत्कृष्ट खेलाडी सर्लाहीका अली हसन घोषित भए । उनले फाइनलको प्लेयर अफ द म्याचको पुरस्कारसमेत प्राप्त गर्दै रु १५ हजार हात पारे ।
उत्कृष्ट ब्याटर बारा जिल्ला क्रिकेट संघका साहिल पटेल घोषित भए भने उत्कृष्ट बलरको उपाधि सर्लाहीका जितेश मण्डलले पाए । विधागततर्फका उत्कृष्ट खेलाडीलाई जनही रु ५ हजार नगद प्रदान गरिएको थियो ।
पुरस्कार वितरण कार्यक्रममा जीतपुरसिमरा उपमहानगरपालिकाका नगर प्रमुख राजन पौडेल, उपप्रमुख भोलाप्रसाद अधिकारी, शिक्षा महाशाखा प्रमुख उपसचिव शिवजी प्रसाद, जनकपुर बोल्ट्सका सञ्चालक महेश सिग्देल, विभिन्न संघसंस्थाका प्रतिनिधि तथा आयोजक जीतपुरसिमरा स्पोर्ट्स क्लबका पदाधिकारीहरूको उपस्थिति रहेको थियो ।
कार्यक्रममा बोल्दै नगर प्रमुख पौडेलले प्रतियोगिताले स्थानीय क्षेत्रमा क्रिकेट गतिविधि बढाएको उल्लेख गर्दै खेलकुद विकासमा नगरपालिकाको निरन्तर सहयोग रहने प्रतिबद्धता व्यक्त गरे ।
प्रतियोगिता चैत २१ गतेदेखि सुरु भएको थियो । प्रतियोगितामा आयोजकसहित बारा, पर्सा, सर्लाही, मकवानपुर र चितवनका टोलीहरूको सहभागिता रहेको थियो ।
