काठमाडौँ । नयाँ वर्ष २०८३ को अवसरमा प्रधानमन्त्री Balendra Shah (बालेन शाह) ले सम्पूर्ण नेपाली नागरिकमा सुख, शान्ति र समृद्धिको हार्दिक शुभकामना व्यक्त गरेका छन् ।
मङ्गलबार बिहान सामाजिक सञ्जालमार्फत शुभकामना सन्देश जारी गर्दै उनले प्रसिद्ध संस्कृत श्लोक उद्धृत गर्दै सबैको सुस्वास्थ्य, समृद्धि र कल्याणको कामना गरेका हुन् ।
प्रधानमन्त्री शाहले आफ्नो सन्देशमा लेखेका छन्, ‘सर्वे भवन्तु सुखिनः सर्वे सन्तु निरामयाः । सर्वे भद्राणि पश्यन्तु, मा कश्चिद् दुःखभाग् भवेत् ॥’
उक्त श्लोकको भावार्थ प्रस्तुत गर्दै उनले सबै नागरिकको जीवनमा सुख, आरोग्य र मंगलमय अवस्था कायम रहोस् भन्ने अपेक्षा व्यक्त गरेका छन् । ‘सदैव शुभ होस्, निर्विघ्नता रहोस् र दुःखको अन्त्य होस्,’ उनले उल्लेख गरेका छन् ।
नयाँ वर्षको शुभारम्भको यस अवसरमा उनले देश तथा विदेशमा रहेका सम्पूर्ण नेपालीमा प्रगति, सहकार्य र समृद्धिको कामना व्यक्त गरेका छन् ।
यसैबीच नयाँ वर्षको पहिलो दिन विभिन्न राजनीतिक दलका नेता, जनप्रतिनिधि तथा विशिष्ट व्यक्तिहरूले सामाजिक सञ्जालमार्फत शुभकामना सन्देश दिने क्रम जारी रहेको छ । सोही सन्दर्भमा प्रधानमन्त्री शाहले पनि संस्कृत श्लोकमार्फत सकारात्मक सन्देश प्रवाह गरेका हुन् ।
