राष्ट्रिय क्रिकेट खेलाडी विवेक यादव अब मधेस प्रदेश क्रिकेट टिमबाट खेल्ने भएका छन् ।
मधेस प्रदेश क्रिकेट संघ को सोमबार बसेको बैठकले यादवलाई प्रदेश टिमबाट खेल्न अनुमति दिने निर्णय गरेको हो । संघका अनुसार यादवले करिब दुई वर्षअघि मधेस प्रदेशबाट खेल्ने इच्छा व्यक्त गर्दै आवेदन दिएका थिए । सो अवधि पूरा भइसकेको आधारमा उनलाई औपचारिक रूपमा प्रदेश टिममा समावेश गर्ने निर्णय गरिएको हो ।
हाल यादव नेपाली सेनाको विभागीय टिम नेपाल आर्मी क्रिकेट टिम बाट खेलिरहेका छन् ।
त्यसैगरी, मधेस प्रदेश क्रिकेट टिम आगामी असारमा भारतको बैंगलोर भ्रमणमा जाने भएको छ । सो भ्रमणका क्रममा टिमले बैंगलोरका उत्कृष्ट क्लब तथा टिमहरूसँग मैत्रीपूर्ण खेल खेल्ने कार्यक्रम तय भएको संघले जनाएको छ। आगामी जुन १८, १९ र २० मा खेल हुनेछन् ।
संघका अनुसार आगामी सिजनको सुरुवातसँगै ‘इलाइट कप’ आयोजना गर्ने तयारी पनि भइरहेको छ । प्रतियोगितामार्फत प्रदेशका उत्कृष्ट खेलाडी छनोट गर्ने योजना रहेको छ ।
म्याच फी सम्बन्धी निर्णयअनुसार ‘A’ लेभलका खेलाडीलाई ३ हजार रुपैयाँ, ‘B’ क्याटोगरीका खेलाडीलाई १,५०० रुपैयाँ र ‘C’ क्याटोगरीका खेलाडीलाई १,००० रुपैयाँ म्याच फी प्रदान गरिने भएको छ ।
त्यसैगरी, यस वर्ष केन्द्रीय कन्ट्रयाक्ट बाहेक ११ जना खेलाडीलाई प्रदेश कन्ट्रयाक्टमा राखिने निर्णय गरिएको छ । सो छनोट प्रक्रियाका लागि कोषाध्यक्ष सुभाष जयसवालको संयोजकत्वमा समिति गठन गरिएको संघले जनाएको छ ।
