आईसिसी क्रिकेट विश्वकप लिग–२ अन्तर्गत सोमबार नेपाल र स्कटल्याण्डबीच प्रतिस्पर्धा हुँदैछ । कीर्तिपुरस्थित त्रिभुवन विश्वविद्यालय अन्तरराष्ट्रिय क्रिकेट मैदान मा भइरहेको खेलमा स्कटल्याण्डले टस जितेर नेपाललाई पहिले बलिङको निम्तो दिएको छ । खेल बिहान ९ः३० बजे सुरु भएको हो ।
आजको खेलका लागि नेपाली टोलीमा कुनै परिवर्तन गरिएको छैन । नेपालको प्लेइङ–११ मा कुशल भुर्तेल, आशीफ शेख, रोहित पौडेल, दीपेन्द्रसिंह ऐरी, इशान पाण्डे, गुल्शन झा, सोमपाल कामी, नन्दन यादव, सन्दीप लामिछाने र ललित राजवंशी रहेका छन् ।
नेपाल, अमेरिका र स्कटल्याण्ड सहभागी जारी शृङ्खलामा हालसम्म तीन खेल सम्पन्न भइसकेका छन् । स्कटल्याण्डले आफ्ना दुवै खेल जितेको छ । पहिलो खेलमा स्कटल्याण्डले नेपाललाई डकवर्थ–लुइस नियमका आधारमा दुई रनले पराजित गरेको थियो भने अर्को खेलमा अमेरिकालाई पनि दुई रनले नै हराएको थियो ।
यता, नेपालले गत शनिबार अमेरिकालाई नौ विकेटले पराजित गर्दै महत्वपूर्ण जीत निकालेको थियो । आजको खेल नेपालका लागि निकै महत्वपूर्ण मानिएको छ। विश्वकपको ग्लोबल क्वालिफायरमा छनोट सम्भावना कायम राख्न नेपाललाई बाँकी सबै १० खेल जित्नुपर्ने अवस्था छ । साथै, एकदिवसीय मान्यता जोगाउन शीर्ष ६ भित्र रहन आवश्यक रहेको छ ।
हाल अङ्क तालिकामा नेपाल २६ खेलबाट २० अङ्कसहित सातौँ स्थानमा रहेको छ। नेपालले नौ खेल जितेको, १५ खेल हारेको तथा दुई खेल अनिर्णित भएको छ । स्कटल्याण्ड भने ३० खेलबाट ३८ अङ्कसहित तालिकाको शीर्ष स्थानमा रहेको छ । उसले १६ खेल जित्दा आठ खेलमा हार बेहोरेको छ भने छ खेल अनिर्णित भएका छन् ।
