बदाम स्वास्थ्यका लागि अत्यन्त लाभदायक खानेकुरा मानिन्छ ।
शरीरलाई आवश्यक स्वस्थ चिल्लो प्राप्त गर्न नियमित बदाम सेवन गर्न सिफारिस गरिन्छ । बदाममा स्वस्थ चिल्लोका साथै प्रोटिन, भिटामिन र खनिज पदार्थ प्रशस्त मात्रामा पाइन्छ । विशेषगरी यसमा म्याग्नेसियम र भिटामिन ‘ई’ भरपूर हुन्छ भने कार्बोहाइड्रेटको मात्रा कम हुन्छ । विशेषज्ञहरूका अनुसार दैनिक पाँच वटा भिजेको बदाम एक महिनासम्म सेवन गर्दा शरीरमा विभिन्न सकारात्मक प्रभाव देखिन सक्छन् ।
१. पाचन प्रणालीलाई सहयोग
सामान्य बदामभन्दा भिजेको बदाम पचाउन सजिलो मानिन्छ। भिजाउँदा बदाममा रहेको ट्यानिन र फाइटिक एसिड कम हुने भएकाले पाचन प्रक्रिया सहज हुन्छ । यसले पेट फुल्ने तथा अपचको समस्या कम गर्न मद्दत गर्छ ।
२. ऊर्जा स्तर बढाउने
बदाम तत्काल ऊर्जा दिने खानेकुरा हो । यसमा स्वस्थ चिल्लो, प्रोटिन र फाइबर हुने भएकाले शरीरमा बिस्तारै ऊर्जा प्रवाह हुन्छ । यसले दिनभरि शरीरलाई सक्रिय र ऊर्जावान राख्न सहयोग पुर्याउँछ ।
३. छाला स्वस्थ राख्ने
बदाममा पाइने भिटामिन ‘ई’ शक्तिशाली एन्टिअक्सिडेन्ट हो । यसले छालाका कोषलाई सुरक्षा प्रदान गर्नुका साथै सूर्यको किरण र प्रदूषणबाट हुने क्षति कम गर्न मद्दत गर्छ । नियमित सेवनले छालालाई नरम र स्वस्थ राख्न सहयोग मिल्छ ।
४. मुटुको स्वास्थ्य सुधार
बदामले खराब कोलेस्टेरोल कम गर्न र राम्रो कोलेस्टेरोल बढाउन सहयोग गर्छ । कोलेस्टेरोल सन्तुलनमा रहँदा मुटुसम्बन्धी रोगको जोखिम कम हुने विश्वास गरिन्छ ।
५. स्मरणशक्ति बढाउन सहयोग
बदाममा रिबोफ्लेभिनजस्ता पोषक तत्त्व पाइन्छ, जसले मस्तिष्कको कार्यक्षमता सुधार गर्न मद्दत गर्छ । नियमित सेवनले स्मरणशक्ति र एकाग्रता बढाउन सहयोग पुग्न सक्छ ।
६. तौल नियन्त्रणमा सहयोग
बदाम पौष्टिक र उच्च क्यालोरीयुक्त भए पनि सीमित मात्रामा सेवन गर्दा तौल नियन्त्रणमा सहयोग पुर्याउन सक्छ । भिजेको बदामले लामो समयसम्म पेट भरिएको अनुभूति गराउने भएकाले अनावश्यक भोक कम हुन्छ ।
किन राम्रो मानिन्छ ३० दिनसम्म भिजेको बदाम खानु ?
दैनिक पाँच वटा भिजेको बदाम सेवन गर्नु स्वस्थ जीवनशैलीको हिस्सा मानिन्छ । नियमित सेवनले शरीरलाई आवश्यक पोषण दिनुका साथै मानसिक स्वास्थ्य, ऊर्जा स्तर र मुड सुधार गर्न पनि मद्दत गर्न सक्छ ।
