काठमाडौँ । साफ महिला च्याम्पियनसिपअन्तर्गत समूह ‘ए’ को अन्तिम खेलमा नेपालले श्रीलंकालाई २–० गोलअन्तरले पराजित गर्दै समूह विजेताका रूपमा सेमिफाइनलमा प्रवेश गरेको छ ।
भारतको गोवास्थित जवाहरलाल नेहरू स्टेडियममा सम्पन्न खेलमा नेपाललाई जित दिलाउन रश्मी कुमारी घिसिङ र कप्तान रेनुका नगरकोटीले एक–एक गोल गरे ।
खेलको सुरुआतदेखि नै आक्रामक देखिएको नेपालले १२औँ मिनेटमा उत्कृष्ट अवसर पाए पनि रश्मी कुमारी घिसिङले गोल गर्न सकिनन् । कप्तान रेनुका नगरकोटीको पासमा वान–बाइ–वान स्थितिमा पुगेकी रश्मीको प्रहार पोस्ट नजिकबाट बाहिरिएको थियो ।
२०औँ मिनेटमा मिना देउवाको क्रसमा रश्मीको हेडर श्रीलंकाली गोलरक्षकले सहजै बचाइन् । त्यसपछि ४०औँ मिनेटमा कप्तान नगरकोटीको प्रहार पोस्टमाथिबाट बाहिरियो भने ४२औँ मिनेटमा दिपा शाहीको कर्नरमा रश्मीको हेडर पनि गोलमा परिणत हुन सकेन ।
पहिलो हाफको इन्जुरी समयमा भने नेपालले अग्रता लियो । रेखा पौडेलले दायाँबाट दिएको उत्कृष्ट पासलाई रश्मी कुमारी घिसिङले डी–बक्सभित्रबाट गोलमा परिणत गर्दै नेपाललाई १–० को अग्रता दिलाइन् ।
दोस्रो हाफमा पनि नेपालले दबाब कायम राख्यो । ६२औँ मिनेटमा कप्तान रेनुका नगरकोटीले डिफेन्डरलाई बिट गर्दै गरेको शानदार लामो प्रहार गोलमा परिणत भएपछि नेपालले अग्रता दोब्बर बनायो ।
खेलको ७१औँ मिनेटमा यू–२० टोलीकी कप्तान बिर्सना चौधरीले राष्ट्रिय सिनियर टोलीबाट डेब्यु गरेकी थिइन् । नेपालले त्यसपछि पनि निरन्तर आक्रमण गरे पनि थप गोल गर्न सकेन ।
यसअघि समूह चरणको पहिलो खेलमा नेपालले भुटानलाई १–० ले पराजित गरेको थियो । लगातार दुई खेल जित्दै नेपालले ६ अंकसहित समूह ‘ए’ को विजेता बन्दै सेमिफाइनल यात्रा तय गरेको हो ।
अब नेपालले सेमिफाइनलमा भारत वा बंगलादेशमध्ये एक टोलीसँग प्रतिस्पर्धा गर्नेछ । समूह ‘बी’ को उपविजेतासँग नेपालले जुन ३ मा हुने पहिलो सेमिफाइनल खेल खेल्नेछ ।
