नेपाल–भारत सीमामा लागूऔषध तस्करी नियन्त्रणका लागि दुवै देशका सुरक्षा निकायले निगरानी कडा बनाइरहेका बेला भारतको सीमावर्ती सहर रक्सौलबाट दुई नेपालीसहित तीन जना ब्राउन सुगरसहित पक्राउ परेका छन् ।
भारतको बिहार राज्यस्थित रक्सौल प्रहरीले गोप्य सूचनाका आधारमा आइतबार स्टेशन रोड क्षेत्रमा विशेष छापा अभियान सञ्चालन गरेको थियो । सो क्रममा ९.६० ग्राम ब्राउन सुगर (स्म्याक) सहित मकवानपुरको हेटौंडा उपमहानगरपालिका–१५ निवासी २२ वर्षीय दिवेश थिङ, २४ वर्षीय शागर कार्की तथा भारतका स्थानीय हर्जन आलम पक्राउ परेका हुन् ।
भारतीय प्रहरीले उनीहरूविरुद्ध लागूऔषधसम्बन्धी मुद्दा दर्ता गरी थप अनुसन्धान अघि बढाएको जनाएको छ । बरामद लागूऔषधको स्रोत तथा आपूर्ति सञ्जालमा संलग्न अन्य व्यक्तिबारे पनि अनुसन्धान भइरहेको प्रहरीको भनाइ छ । घटनापछि सीमापार लागूऔषध ओसारपसार नियन्त्रणका लागि अपनाइएका सुरक्षा उपायहरूको प्रभावकारिताबारे पनि प्रश्न उठ्न थालेको छ । हेटौंडाबाट भारत प्रवेश गर्न पथलैया, वीरगञ्ज, बारा, रौतहटलगायत क्षेत्रका विभिन्न सुरक्षा जाँच बिन्दु पार गर्नुपर्ने अवस्था रहेको छ । यो पहिलो घटना भने होइन । पछिल्ला महिनाहरूमा पनि नेपाल–भारत सीमावर्ती नाकाबाट तस्करी गरी भारत पुर्याइएका लागूऔषध तथा अन्य अवैध सामग्री भारतीय सुरक्षाकर्मीले पटक–पटक बरामद गर्दै आएका छन् ।
भारतीय सञ्चारमाध्यमका अनुसार पूर्वी चम्पारणका प्रहरी प्रमुख एसपी सुवर्ण प्रभातको नेतृत्वमा सञ्चालन गरिएको विशेष अभियानअन्तर्गत जुन महिनामा मात्रै ५४९ किलोग्राम गाँजा, १२ किलोग्राम अफिम, ५७ किलोग्राम डोडा (पोस्ता) तथा २० लाख ३६ हजार १२७ लिटर अवैध मदिरा बरामद गरिएको छ । पूर्वी चम्पारण जिल्लाको सीमा नेपालका पर्सा, बारा र रौतहटका अधिकांश नाकासँग जोडिएको छ । यस क्षेत्रमा ठूलो परिमाणमा लागूऔषध तथा अवैध मदिरा बरामद भइरहेका घटनालाई सीमापार तस्करी अझै सक्रिय रहेको संकेतका रूपमा हेरिएको छ ।
सुरक्षा विज्ञहरूका अनुसार सीमामा चेकजाँचको संख्या मात्र बढाएर पर्याप्त हुँदैन। सूचना आदान–प्रदान, प्रविधिमैत्री निगरानी, जोखिमका आधारमा हुने जाँच तथा दुवै देशका सुरक्षा निकायबीच प्रभावकारी समन्वय आवश्यक रहेको उनीहरूको धारणा छ ।
यस घटनाबारे नेपाली सुरक्षा निकायले हालसम्म औपचारिक धारणा सार्वजनिक गरेका छैनन् ।
