वीरगंज महानगरपालिकाको नर्सरीबाट बिरुवा चोरी भएको अनौठो घटना सार्वजनिक भएको छ ।
महानगरपालिका सौन्दर्यका लागी उब्जाऊ गर्दै आएको नर्सरीबाट फेक्सीटल पाम ४० थान, सत्साल ३० थान र गुलमोहर ५० थान गरी १ सय २० थान विरुवा चोरी भएको थियो । उक्त चोरीको घटनाको छानविन गर्दा वीरगंज महानगरमा लिखित स्पष्टिकरण पेश गरेका नर्सरी संरक्षक राजु चौधरी र कृष्ण दास सरभङका अनुसार साउन २१ गते विहिबारका दिन आदर्शनगरस्थित पानीटंकीको उत्तरपट्टि रहेको नर्सरीबाट ताल्चा लगाईरहेको अवस्थामा ग्रीन सिटी सामुदायिक सेवा केन्द्रका अटो चालक विश्वकर्मा नाम गरेका व्यक्तिले जबरजस्ती बिरुवा निकालेर लगेको दाबी सहित स्पष्टिकरण पेश गरेको छ ।
वीरगंज महानगरमा पेश गरेकाे लिखित स्पष्टिकरण
वीरगंज महानगरपालिकामा जति वृक्षरोपण भएको छ त्यो हुर्काउने मात्रै काम भइदिएको भए तराईको चारकोसे झाडी भन्दा घना जङ्गल वीरगंज महानगरमा हुनसक्थे । तर वीरगंज महानगरको बिरुवामा ग्रीन सिटी सामुदायिक सेवा केन्द्रका आफूलाई समाजसेवी भनेर चिनाउने जयप्रकाश खेतानको निर्देशनमा बिरुवा लगेको स्रोतले दाबी गरेको छ ।
यता विदेश भ्रमणमा गएका जयप्रकाश खेतानले भने महानगरबाट ५ वर्षसम्म काम गर्ने कुरा भएको दाबी गरे । उनका अनुसार आफू महानगरपालिकाको सरसफाइ तथा हरियाली कार्यक्रमको संयोजक रहेको र वीरगंजका विभिन्न स्थानमा आफ्नै पहल तथा खर्चमा सयौँ बिरुवा रोप्दै आएको उनको दाबी थियो ।
वीरगंजमा समाजसेवा गर्दा चोरको आरोप लाग्छ भने केही छैन् । भनोस् लागोस् बताए । हामीले भएको के हो विषय खुलाउन खोज्दा उनी आफूले समाजसेवा गरिरहेको वीरगंजवासीलाई थाहा छ भन्ने प्रतिकृया दिए ।
खेतानका अनुसार वीरगंज महानगरपालिकाका कर्मचारीहरूले साउन २१ गते नर्सरीबाट निकालिएका भनिएका बिरुवा त्यसको भोलिपल्टै वीरगंज महानगरपालिका–१ छपकैयास्थित बबिता पराजुली आधारभूत विद्यालय र छठघाट परिसरमा वृक्षारोपण गरिएको दाबी गरेका छन् ।
तर यता महानगर कर्मचारीका अनुसार सशस्त्र प्रहरी बल नेपाल नं. १३ गण हेडक्वार्टर पर्साको आयोजना तथा ग्रिन सिटीको सहकार्यमा गरिएको उक्त वृक्षारोपण कार्यक्रममा महानगर कै नर्सरीबाट लगिएका बिरुवा वृक्षारोपण गरिएको थियो ।
