रौतहटको गरुडा नगरपालिका–६ पोठीयाही गाउँबाट भारतको झारखण्डस्थित बाबा वैद्यनाथ धाम र बासुकीनाथ मन्दिरको दर्शनका लागि गएका नेपाली तीर्थयात्री सवार बस शुक्रबार दुर्घटनामा पर्दा तीन जनाको मृत्यु भएको छ भने ४५ भन्दा बढी यात्रु घाइते भएका छन् । मृत्यु हुनेमध्ये एक जना १४ वर्षीय बालक रहेका छन् ।
दर्शन तथा पूजा सम्पन्न गरी फर्कने क्रममा बस ट्रकसँग ठोक्किँदा दुर्घटना भएको हो । दुर्घटनाका बेला बसमा चालक, सहचालक तथा अन्य यात्रुसहित करिब ५० जना सवार रहेको बताइएको छ । घाइतेमध्ये अधिकांशको विभिन्न अस्पतालमा उपचार भइरहेको छ भने केहीको अवस्था गम्भीर रहेको जनाइएको छ ।
गरुडा नगरपालिका–६ पोठीयाहीका वडाध्यक्ष रामबाबु चौधरीका अनुसार दुर्घटनामा स्थानीय नवल चौधरी र उनकी श्रीमतीको मृत्यु भएको छ । त्यस्तै, गाउँकै राजेश महतोका १४ वर्षीय छोरा शिवम महतोको पनि ज्यान गएको उनले जानकारी दिए ।
वडाध्यक्ष चौधरीका अनुसार पोठीयाही गाउँबाट ४७ जना तीर्थयात्राका लागि बुधबार भारत प्रस्थान गरेका थिए । “उहाँहरू बाबाधाम यात्राका लागि बुधबार निस्किनुभएको थियो । घटनामा परेकाहरूको अवस्थाबारे थप विवरण संकलन गरिरहेका छौँ,” उनले भने । भारतीय सञ्चारमाध्यम लोकतन्त्र–१९ का अनुसार बाबा वैद्यनाथ धाम र बासुकीनाथको दर्शन तथा पूजा सम्पन्न गरी फर्कने क्रममा झारखण्ड राज्यको कोडरमा जिल्लाको पोखरडिहा मोड नजिक बस र ट्रक एकआपसमा ठोक्किँदा दुर्घटना भएको हो ।
उक्त सञ्चारमाध्यमका अनुसार दुर्घटनामा तीन जना नेपाली तीर्थयात्रीको मृत्यु भएको छ । दुर्घटनापछि सदगावा थाना प्रहरीले तत्काल घटनास्थल पुगेर उद्धार कार्य सुरु गरेको थियो । घाइतेहरूलाई नजिकैका अस्पतालमा उपचारका लागि भर्ना गरिएको छ। घाइतेमध्ये केहीको अवस्था चिन्ताजनक रहेको भारतीय प्रहरीले जनाएको छ ।
रौतहटका प्रमुख जिल्ला अधिकारी दिनेश सागर भुसालले भारतमा नेपाली तीर्थयात्री सवार बस दुर्घटना भएको जानकारी आफूले पनि प्राप्त गरेको बताए । “हामी भारतीय सुरक्षा अधिकारीहरूमार्फत घटनाको विस्तृत जानकारी लिइरहेका छौँ । यस विषयमा सम्बन्धित माथिल्लो निकायलाई समेत जानकारी गराइसकेका छौँ,” उनले भने ।
