अर्थमन्त्री डा. स्वर्णिम वाग्लेले विदेशमा रहेका नेपालीलाई नेपालमा ढुक्कसँग लगानी गर्न आग्रह गर्नुभएको छ ।
चीनको ग्वाङझाउ सहरमा शनिबारदेखि सुरु भएको गैरआवासीय नेपाली संघ (एनआरएनए) को ११औँ एसिया प्यासेफिक सम्मेलनलाई भिडियो सन्देशमार्फत शुभकामना दिँदै अर्थमन्त्री वाग्लेले नेपालमा लगानीको वातावरण निर्माण भइरहेको बताउनुभयो ।
सरकारले लगानीमैत्री वातावरण निर्माण, स्वदेशमै मर्यादित रोजगारी सिर्जना तथा कृत्रिम बुद्धिमत्ता (एआई) र सूचना प्रविधि क्षेत्रलाई प्रोत्साहन गर्ने गरी नीतिगत रणनीति कार्यान्वयन गरिरहेको उहाँले जानकारी दिनुभयो ।
उहाँले प्रवासी नेपालीलाई पर्यटन, सूचना प्रविधि, हरित ऊर्जा, उच्च मूल्ययुक्त कृषि तथा आयात प्रतिस्थापन हुने क्षेत्रमा लगानी बढाउन आग्रह गर्नुभयो । सरकारले चालु बजेटमार्फत २७ वटा ऐन तथा कानुन संशोधन गरी लगानीमैत्री वातावरण निर्माण गरेको दाबी गर्दै अर्थमन्त्री वाग्लेले आर्थिक राजकाज र कर प्रणालीमा समेत व्यापक सुधार अघि बढाइएको बताउनुभयो ।
उहाँका अनुसार पहिलो वर्ष सुधारको सुरुआत गरिएको छ भने दोस्रो वर्ष सुधारलाई थप फराकिलो बनाइनेछ । तेस्रो र चौथो वर्षमा सुधारको नतिजा देखिने तथा त्यसपछि जनताले त्यसको प्रतिफल प्राप्त गर्ने उहाँको भनाइ छ ।
यी लक्ष्य हासिल गर्न आन्तरिक तथा गैरआवासीय नेपालीको पुँजी र ज्ञान महत्वपूर्ण रहेको अर्थमन्त्री वाग्लेले बताउनुभयो । सरकारले गैरआवासीय नेपालीको ज्ञान र पुँजी नेपाल भित्र्याउने नीति लिएको उल्लेख गर्दै धितोपत्र बाँडफाँड तथा निष्कासन नियमावली संशोधन गरी नेपाल सरकार र एनआरएन इन्भेस्टमेन्ट फन्डबाट जारी हुने सेयरको हिस्सा ८५ प्रतिशत पुर्याइएको उहाँले जानकारी दिनुभयो ।
यसैगरी सरकारले रुग्ण उद्योग पुनः सञ्चालन गर्ने नीति लिएको उल्लेख गर्दै अर्थमन्त्री वाग्लेले ज्ञान, सीप र पुँजी भएका गैरआवासीय नेपालीलाई त्यस्ता उद्योगमा समेत सहभागी हुन आग्रह गर्नुभयो ।
