सभामुख अर्यालद्वारा प्रधानमन्त्री बालेन्द्र शाहलाई सांसदका प्रश्नको जवाफ दिन रुलिङ

राष्ट्रिय

Home
राष्ट्रिय
सभामुख अर्यालद्वारा प्रधानमन्त्री बालेन्द्र शाहलाई सांसदका प्रश्नको जवाफ दिन रुलिङ

सभामुख अर्यालद्वारा प्रधानमन्त्री बालेन्द्र शाहलाई सांसदका प्रश्नको जवाफ दिन रुलिङ

वीरगंज सिटी सोमबार, भदौ १, २०८३

सभामुख डोलप्रसाद अर्यालले प्रतिनिधि सभामा सांसदहरूले उठाएका प्रश्नहरूको जवाफ दिन प्रधानमन्त्री बालेन्द्र शाहलाई सदनमा उपस्थित हुन रुलिङ गरेका छन् ।

सोमबार बसेको प्रतिनिधि सभाको बैठकमा सभामुख अर्यालले प्रतिनिधि सभा नियमावलीको व्यवस्थाअनुसार प्रधानमन्त्रीलाई सदनमा उपस्थित भई सांसदका प्रश्नको जवाफ दिन निर्देशन दिएका हुन् । सांसदहरूले विभिन्न समसामयिक विषय तथा सरकारको कार्यशैलीलाई लिएर उठाएका प्रश्नको सम्बोधन नभएको भन्दै ध्यानाकर्षण गराएपछि सभामुखबाट यस्तो रुलिङ आएको हो ।

सभामुख अर्यालले प्रतिनिधि सभा नियमावलीको नियम ५६ अनुरूप प्रधानमन्त्रीको कार्यक्षेत्रसँग सम्बन्धित विषयमा तथा नियम ५७, ५८ र ५९ को प्रावधानबमोजिम सांसदहरूले राखेका जिज्ञासा र प्रश्नहरूको उत्तर दिन प्रधानमन्त्रीलाई निर्देशन दिएका हुन् ।

‘प्रतिनिधि सभा नियमावलीको नियम ५६, ५७, ५८ र ५९ मा भएको व्यवस्थाबमोजिम माननीय सांसदहरूले उठाउनुभएका प्रश्नहरूको जवाफ दिन म प्रधानमन्त्रीज्यूलाई रुलिङ गर्दछु,’ सभामुख अर्यालले बैठकमा भने । नियम ५६ मा प्रधानमन्त्रीसँग प्रत्यक्ष प्रश्नोत्तरको व्यवस्था छ भने नियम ५७ देखि ५९ सम्म प्रश्नको सूचना, मर्यादा तथा उत्तर दिने प्रक्रियासम्बन्धी व्यवस्था गरिएको छ ।

पछिल्लो समय सदनमा सांसदहरूले उठाएका प्रश्नको जवाफ सरकारका तर्फबाट नआएको भन्दै सांसदहरूले नियमापत्ति जनाउँदै आएका थिए । सोही विषयलाई सम्बोधन गर्दै सभामुखले प्रधानमन्त्रीलाई सदनमा उपस्थित भई जवाफ दिन निर्देशन दिएका हुन् ।