वीरगंजस्थित नारायणी अस्पतालमा निश्चेतना विशेषज्ञ (एनेस्थेसियोलोजिस्ट) को अभावका कारण गम्भीर प्रकृतिका शल्यक्रिया गर्नुपर्ने बिरामी निजी अस्पतालमा जान बाध्य हुने अवस्था देखिएको छ । पर्याप्त दरबन्दी र जनशक्ति नहुँदा विगत एक वर्षदेखि अस्पतालको शल्यक्रिया सेवा प्रभावित हुँदै आएको बताइएको छ ।
अस्पतालमा कम्तीमा सात जना निश्चेतना विशेषज्ञ आवश्यक पर्ने भए पनि हाल एक जना मात्र आधिकारिक रूपमा कार्यरत छन् । दुई जना निश्चेतना विशेषज्ञ प्रशिक्षणमा रहेका कारण अस्पतालमा २४ घण्टे निश्चेतना सेवा सञ्चालन गर्न कठिनाइ भइरहेको अस्पताल स्रोतले जनाएको छ ।
शल्यक्रियाका लागि चौबीसै घण्टा निश्चेतना विशेषज्ञ आवश्यक पर्ने भए पनि जनशक्ति अभावका कारण बिरामीले सहज रूपमा सेवा पाउन नसकेको गुनासो छ । विशेषगरी आकस्मिक तथा प्रसूति शल्यक्रियामा यसको प्रत्यक्ष प्रभाव पर्ने गरेको बताइएको छ ।
नारायणी अस्पतालमा दैनिक करिब नौ जना गर्भवती महिलाको शल्यक्रिया हुने गरेको छ । यसबाहेक दैनिक पाँच जनाभन्दा बढी बिरामीको अन्य प्रकारका शल्यक्रिया हुने गरेको अस्पताल स्रोतको भनाइ छ । निश्चेतना विशेषज्ञको अभाव हुँदा नियमितसँगै आकस्मिक शल्यक्रियासमेत प्रभावित हुने गरेको बताइएको छ ।
यस्तो अवस्थामा कतिपय बिरामीलाई निजी अस्पतालमा लैजाने गरिएको आरोपसमेत लाग्दै आएको छ । सरकारी अस्पतालमा आवश्यक सेवा, उपकरण वा उपचार उपलब्ध नभएको भन्दै बिरामीलाई निजी अस्पतालतर्फ लैजाने प्रवृत्ति लामो समयदेखि रहेको आरोप छ ।
नारायणी अस्पतालबाट बिरामीलाई निजी अस्पतालतर्फ लैजाने कार्यमा अस्पतालमै कार्यरत चिकित्सक, अहेब, स्टाफ नर्स, कर्मचारी तथा सफाइ कर्मचारीसमेत संलग्न हुने गरेको आरोप लाग्दै आएको छ । निजी अस्पतालमा बिरामी पठाएबापत कमिसन लिने गरिएको आरोपसमेत रहेको छ ।
वीरगंजमा ४० भन्दा बढी निजी अस्पताल सञ्चालनमा छन् । तीमध्ये अधिकांश निजी अस्पतालमा नारायणी अस्पतालमा कार्यरत चिकित्सकसमेत संलग्न रहेको बताइन्छ । सरकारी अस्पतालमा उपचारका लागि आएका बिरामीलाई निजी अस्पतालतर्फ लैजाने प्रवृत्तिले सरकारी स्वास्थ्य संस्थाप्रतिको जनविश्वासमा समेत असर पार्ने सरोकारवालाहरूको भनाइ छ ।
नारायणी अस्पतालका सूचना अधिकारी डा. उदयनारायण सिंहले अस्पतालमा निश्चेतना विशेषज्ञको अभाव रहेको स्वीकार गरेका छन् । अस्पतालमा उपलब्ध नभएको सेवा आवश्यक पर्ने अवस्थामा बिरामी निजी अस्पताल जाने गरेको उनले बताए । यद्यपि, अस्पतालमा उपलब्ध सेवाहरू भने नियमित रूपमा प्रदान भइरहेको उनको दाबी छ ।
विशेषगरी आकस्मिक तथा प्रसूति शल्यक्रियाजस्ता संवेदनशील सेवाका लागि पर्याप्त निश्चेतना विशेषज्ञको व्यवस्था नहुँदा बिरामीले सरकारी अस्पतालको सेवा छाडेर निजी संस्थाको महँगो उपचार सेवा लिनुपर्ने अवस्था सिर्जना भएको छ ।
सर्वसाधारणको ठूलो भरोसा रहेको नारायणी अस्पतालमा आवश्यक जनशक्ति तत्काल व्यवस्थापन गरी शल्यक्रिया सेवा प्रभावकारी बनाउनुपर्ने माग बढेको छ । साथै, सरकारी अस्पतालबाट निजी अस्पतालमा बिरामी लैजाने गरिएको आरोपबारे निष्पक्ष छानबिन गरी दोषी देखिए कारबाही गर्नुपर्ने आवश्यकता पनि देखिएको छ ।
