मकवानपुरमा यात्रुवाहक विद्युतीय गाडी दुर्घटना हुँदा चार जनाको मृत्यु भएको छ ।
मंगलबार दिउँसो २ बजे इन्द्रसरोवर गाउँपालिका–२ सुकौरास्थित हेटौंडा–भीमफेदी–कुलेखानी–फाखेल सडकखण्डमा दुर्घटना भएको हो । प्रहरीका अनुसार काठमाडौंबाट वीरगन्जतर्फ आउँदै गरेको म.प्र.०३–००१ ज ०७२० नम्बरको यात्रुवाहक गाडी सडकबाट करिब १ हजार मिटर तल खसेको थियो ।
दुर्घटनामा चार पुरुषको घटनास्थलमै मृत्यु भएको प्रहरीले जनाएको छ। चार जना घाइते भएका छन् । घाइतेमध्ये दुई पुरुष र एक महिलालाई उपचारका लागि काठमाडौं पठाइएको छ । अर्की एक महिलालाई उपचारका लागि हेटौंडा पठाइएको प्रहरीले जनाएको छ । गाडीमा चालकसहित आठ जना रहेको प्रारम्भिक विवरण छ ।
दुर्घटनापछि प्रहरी, सशस्त्र प्रहरी र नेपाली सेनाको टोली घटनास्थलमा पुगेर उद्धार गरेको थियो। जिल्ला प्रहरी कार्यालय मकवानपुरका प्रहरी उपरीक्षक श्यामबहादुर खत्रीको कमान्डमा ट्राफिक प्रहरीसहित २१ जनाको टोली उद्धारमा खटिएको थियो ।
घटनाबारे थप अनुसन्धान भइरहेको प्रहरीले जनाएको छ ।
भिडियाे रिपाेर्ट
