स्थानीय तहमा जनताका दैनिक समस्या समाधान गर्ने पहिलो ढोका वडा कार्यालय हो ।
जन्मदर्ता, मृत्युदर्ता, विभिन्न सिफारिस तथा अन्य प्रशासनिक कामका लागि नागरिकले सबैभन्दा पहिले वडा कार्यालयकै सेवा लिनुपर्ने हुन्छ । तर, वीरगंज महानगरपालिका वडा नम्बर १ मा भने जनप्रतिनिधिको नियमित उपस्थिति नहुँदा सेवाग्राहीले सास्ती भोग्नुपरेको स्थानीयको गुनासो छ ।
वडा कार्यालयमा जनप्रतिनिधि नियमित रूपमा नभेटिँदा सामान्य सिफारिसदेखि विभिन्न प्रशासनिक कामका लागि समेत सेवाग्राहीले पटक–पटक कार्यालय धाउनुपर्ने अवस्था रहेको स्थानीय बताउँछन् । आवश्यक काम लिएर वडा कार्यालय पुग्दा जनप्रतिनिधि नभेटिएपछि कतिपय सेवाग्राही रित्तो हात फर्किन बाध्य हुने गरेका छन् ।
जनप्रतिनिधिको अनुपस्थितिले सेवाप्रवाहमा परेको असर, सेवाग्राहीले भोग्नुपरेका समस्या र वडा कार्यालयप्रति स्थानीयका गुनासालाई समेटेर आजको ‘हामीलाई भन्नुछ’ कार्यक्रममा प्रस्तुत गरिएको छ ।
