भारतको बिहार राज्यस्थित वैशाली जिल्लामा डुङ्गा डुब्दा १३ बालबालिकाको मृत्यु भएको छ भने सात जनाको उद्धार गरिएको छ । मृत्यु हुने सबै बालबालिका १५ वर्ष वा सोभन्दा कम उमेरका रहेको जिल्ला प्रशासनले जनाएको छ ।
जिल्ला मजिस्ट्रेट वर्षा सिंहका अनुसार मङ्गलबार साँझ करिब ८ः३० बजे छिमेकी गाउँमा आयोजित भोजमा सहभागी हुन जाँदै गरेका करिब १५ देखि २० जना बालबालिका सवार डुङ्गा पल्टिएर दुर्घटना भएको हो ।
घटनाप्रति दुःख व्यक्त गर्दै जिल्ला मजिस्ट्रेट सिंहले उद्धार गरिएका सात जनालाई उपचारका लागि एनएमसीएच लगिएको र उनीहरूको अवस्था स्थिर रहेको जानकारी दिइन् ।
दुर्घटनापछि उद्धार तथा खोजी कार्यका लागि राज्य विपद् प्रतिक्रिया बल (एसडीआरएफ) को टोली परिचालन गरिएको छ। स्थानीय गोताखोरको सहयोगमा पनि उद्धार कार्य सञ्चालन गरिएको जिल्ला प्रशासनले जनाएको छ ।
डुङ्गामा सवार सबैको अवस्था र दुर्घटनाको विस्तृत विवरणबारे थप जानकारी आउन बाँकी रहेको छ। बेपत्ता भएका व्यक्तिको खोजीका लागि उद्धार टोली परिचालन गरिएको थियो ।
यसैबीच, भारतका प्रधानमन्त्री नरेन्द्र मोदीले दुर्घटनामा बालबालिकाको मृत्यु भएको घटनाप्रति दुःख व्यक्त गरेका छन् । उनले मृतकका आफन्तलाई प्रधानमन्त्री राष्ट्रिय राहत कोष (पीएमएनआरएफ) बाट प्रतिपरिवार दुई लाख भारतीय रुपैयाँ र घाइतेलाई ५० हजार भारतीय रुपैयाँ आर्थिक सहायता उपलब्ध गराउने घोषणा गरेका छन् ।
