जिल्लामा सन् २०२६ को जनवरीदेखि हालसम्म ८० जना नयाँ एचआइभी सङ्क्रमित थपिएका छन् ।
जोखिममा रहेका समूहमा गरिएको परीक्षणका क्रममा उनीहरूमा सङ्क्रमण पुष्टि भएको हो । भरतपुर अस्पतालमा रहेको एड्स हेल्थ फाउन्डेसनले २२३ जनामा गरेको परीक्षणका क्रममा ८० जनामा एचआइभी सङ्क्रमण देखिएको जनाएको छ । यस अवधिमा नयाँ सङ्क्रमितसहित ९१ जना नयाँ बिरामीले एचआइभीविरुद्धको एआरटी औषधि सेवन गर्न थालेका छन् । औषधि सेवन सुरु गर्ने ११ जना भने जिल्लाबाहिरबाट आएका हुन् ।
यससँगै फाउन्डेसनबाट नियमित रूपमा एआरटी औषधि सेवन गर्ने बिरामीको सङ्ख्या एक हजार २९३ पुगेको छ ।
अस्पतालका फिजिसियन डा। प्रमोद पौडेलका अनुसार एचआइभी सङ्क्रमितसहितका व्यक्तिमा गरिएको यौनरोग परीक्षणका क्रममा ५२ जनामा यौनरोगको सङ्क्रमण देखिएको छ । एक हजार १६१ जनामा गरिएको परीक्षणका क्रममा उनीहरूमा यौनरोग पुष्टि भएको हो । सङ्क्रमण देखिएका व्यक्तिको उपचार गरिएको उहाँले जानकारी दिनुभयो ।
डा। पौडेलले सरकारी तवरबाट कन्डम उपलब्ध हुन नसक्दा जोखिममा रहेका समूहमा असुरक्षित यौनसम्पर्कका कारण यौनरोग तथा भिरिङ्गीको समस्या देखिएको बताउनुभयो ।
त्यस्तै, एचआइभी सङ्क्रमितमा क्षयरोगको समस्या पनि देखिने गरेको उहाँले जानकारी दिनुभयो । एक सय ४८ जनाको खकार परीक्षण गर्दा १५ जनामा क्षयरोग पुष्टि भएको छ ।
फाउन्डेसनका अनुसार सन् २०२६ को जनवरीदेखि हालसम्म नियमित औषधि सेवन गरिरहेका तीन जनाले औषधि लिन छाडेका छन् । उनीहरू हालसम्म सम्पर्कमा समेत नआएको फाउन्डेसनले जनाएको छ ।
फाउन्डेसनका कार्यक्रम संयोजक कृष्णहरि सापकोटाका अनुसार यस अवधिमा औषधि लिन आउने गरिब, वृद्धवृद्धा तथा एकल महिलासहित एक हजार २११ जनालाई यातायात, प्रयोगशाला परीक्षण, पोषण, औषधि तथा आकस्मिक सेवामा सहयोग प्रदान गरिएको छ ।
नियमित रूपमा औषधि सेवन गर्दा एचआइभी सङ्क्रमणलाई नियन्त्रणमा राख्न र स्वास्थ्य अवस्था राम्रो बनाउन सकिने उहाँले बताउनुभयो ।
