स्वास्थ्य तथा खाद्य स्वच्छता मन्त्रालयले नेपाल सरकारका विभिन्न निकायमा कार्यरत राष्ट्रसेवक कर्मचारीलाई स्वास्थ्य बीमा कार्यक्रममा आबद्ध गराउन आवश्यक समन्वय र सहजीकरणका लागि पत्राचार गरेको छ ।
मन्त्रालयले भूमि व्यवस्था, सहकारी तथा गरिबी निवारण मन्त्रालय र सङ्घीय मामिला तथा सामान्य प्रशासन मन्त्रालयलाई पत्र पठाउँदै स्वास्थ्य बीमा ऐन तथा नियमावलीमा भएको व्यवस्थाबमोजिम कर्मचारीलाई स्वास्थ्य बीमा कार्यक्रममा समेट्न सम्बन्धित निकायसँग समन्वय गर्न अनुरोध गरेको हो ।
मन्त्रालयले नेपाल सरकारका मन्त्रालय, सचिवालय, आयोग, प्रदेश तथा स्थानीय तहमा कार्यरत कर्मचारीलाई स्वास्थ्य बीमामा आबद्ध गराउन आवश्यक पत्राचार, समन्वय र सहजीकरण गरिदिन आग्रह गरेको छ ।
सरकारी सेवामा कार्यरत कर्मचारीको स्वास्थ्य बीमामा आबद्धता विस्तार गर्दै स्वास्थ्य बीमा कार्यक्रमलाई व्यवस्थित बनाउने उद्देश्यले यस्तो पहल गरिएको मन्त्रालयले जनाएको छ ।
सरकारी अस्पतालका कर्मचारीलाई पनि स्वास्थ्य बीमामा समेट्ने
मन्त्रालयले सरकारी अस्पताल, स्वास्थ्य विज्ञान प्रतिष्ठान तथा अन्य सङ्घीय निकायमा कार्यरत राष्ट्रसेवक कर्मचारीलाई समेत स्वास्थ्य बीमा कार्यक्रममा आबद्ध गराउन पत्राचार गरेको छ ।
यसका लागि सम्बन्धित विभाग, प्रतिष्ठान र अस्पताललाई आवश्यक समन्वय तथा सहजीकरण गरी कर्मचारीलाई स्वास्थ्य बीमाको दायरामा ल्याउन आग्रह गरिएको छ ।
सरकारी सेवामा कार्यरत कर्मचारीलाई स्वास्थ्य बीमामा आबद्ध गराउने व्यवस्थाको कार्यान्वयनमा सम्बन्धित निकायबीच समन्वय बढाउने मन्त्रालयको प्रयास रहेको छ ।
