पर्साको जिराभवानी गाउँपालिका–२, सेढवास्थित मिनी रङ्गशालामा सञ्चालन भइरहेको प्रथम जिराभवानी भेट्रान्स गोल्डकप फुटबल प्रतियोगिताअन्तर्गत वीरगंज सिटी विजयी घोषित भएको छ ।
प्रतियोगिताको पहिलो खेलमा हरिवन भेट्रान्स र वीरगञ्ज सिटीबीच प्रतिस्पर्धा हुने तालिका थियो । तर, हरिवन भेट्रान्सका खेलाडी उपस्थित नभएपछि वीरगंज सिटीलाई विजयी घोषित गरिएको हो ।
त्यसैगरी, दोस्रो खेलमा बकुलिया बारा भेट्रान्स र शक्ति भेट्रान्स परवानीपुरबीच प्रतिस्पर्धा भएको थियो । निर्धारित खेलपछि पेनाल्टी सुटआउटमा पुगेको प्रतिस्पर्धामा बकुलिया बारा भेट्रान्सले ४–३ गोलको नतिजासहित जित निकालेको हो । उक्त खेलमा बकुलिया बारा भेट्रान्सका जर्सी नम्बर २२ का खेलाडी ‘म्यान अफ द म्याच’ घोषित भएका छन् ।
प्रतियोगिताअन्तर्गत भोलि बिहान हुने सेमिफाइनल खेलमा युथ एकेडेमी वीरगंज भेट्रान्स र जिराभवानी भेट्रान्सबीच प्रतिस्पर्धा हुनेछ ।
भेट्रान्स खेलाडीको सहभागितामा सञ्चालन भइरहेको प्रतियोगिताले स्थानीय क्षेत्रमा फुटबलप्रतिको आकर्षण बढाउनुका साथै अनुभवी खेलाडीलाई आफ्नो खेलकौशल प्रदर्शन गर्ने अवसर प्रदान गरेको छ ।
