वीरगंज महानगरपालिका–१२ मुर्ली टोलको मुख्य सडकमा जाने बाटोमा रहेको नालाको सफाइमा कमजोरी देखिएको छ। नालामा फोहोर थुप्रिँदा दुर्गन्ध फैलिने र खानेपानीको पाइपमा समेत असर पर्ने जोखिम रहेको स्थानीयले बताएका छन्।
स्थानीयका अनुसार नालामा फोहोर थुप्रिएको छ भने सोही नालाभित्र खानेपानीको पाइपसमेत बिछ्याइएको छ। नाला नियमित रूपमा सफा नगरिँदा फोहोर तथा दूषित पानीका कारण खानेपानीको पाइप प्रभावित हुन सक्ने उनीहरूको आशङ्का छ।
खानेपानी नागरिकको स्वास्थ्यसँग प्रत्यक्ष जोडिएको विषय भएकाले नालाको सरसफाइ र पाइपको सुरक्षामा विशेष ध्यान दिनुपर्ने स्थानीयको भनाइ छ। नालामा फोहोर थुप्रिँदा पाइपमा क्षति पुगेमा वा चुहावट भएमा खानेपानी दूषित हुने जोखिमसमेत रहन सक्छ।
स्थानीयले वीरगंज महानगरपालिकासँग मुर्ली टोलको उक्त नाला तत्काल सफाइ गर्न र नालाभित्र बिछ्याइएको खानेपानीको पाइप सुरक्षित रहे–नरहेको जाँच गर्न माग गरेका छन्। नियमित सरसफाइ र खानेपानीको पाइपको सुरक्षामा सम्बन्धित निकायले ध्यान दिनुपर्ने उनीहरूको भनाइ छ।
