नेपाल क्रिकेट संघ (क्यान) को आयोजनामा सञ्चालन हुन लागेको नेपाल प्रिमियर लिग (एनपीएल) को तेस्रो संस्करणको सम्पूर्ण तयारी पूरा भएको छ ।
प्रतियोगिता भोलिदेखि कीर्तिपुरस्थित त्रिवि अन्तर्राष्ट्रिय क्रिकेट मैदानमा सुरु हुँदैछ । प्रतियोगितामा लुम्बिनी लायन्स, सुदूरपश्चिम रोयल्स, विराटनगर किङ्स, चितवन राइनोज, जनकपुर बोल्ट्स, पोखरा एभेन्जर्स, कर्णाली याक्स र काठमाडौं गोर्खाज गरी आठ फ्रेन्चाइज टोलीले प्रतिस्पर्धा गर्नेछन् ।
मंसिर ५ गतेसम्म सञ्चालन हुने प्रतियोगितामा कुल ३२ खेल हुनेछन् । प्रतियोगिताको उद्घाटन खेलमा भोलि साँझ ५ बजे साविक विजेता लुम्बिनी लायन्स र उपविजेता सुदूरपश्चिम रोयल्स आमनेसामने हुनेछन् ।
यस संस्करणको एनपीएलमा पहिलोपटक हक-आई प्रविधिमा आधारित डिसिजन रिभ्यु सिस्टम (डीआरएस) प्रयोग गरिनेछ । यस व्यवस्थाअन्तर्गत प्रत्येक टोलीले एक इनिङ्समा दुईवटासम्म रिभ्यु लिन पाउनेछन् ।
अन्तर्राष्ट्रिय क्रिकेट परिषद् (आईसीसी) बाट प्रतियोगिताले आधिकारिक मान्यता पाएपछि यसको महत्त्व थप बढेको आयोजकको विश्वास छ । अन्तर्राष्ट्रिय स्तरका अनुभवी तथा चर्चित विदेशी खेलाडीको सहभागिताले नेपाली खेलाडीलाई उच्चस्तरीय प्रतिस्पर्धाको अनुभव हासिल गर्ने अवसर मिल्ने अपेक्षा गरिएको छ ।
प्रतियोगितालाई थप व्यवस्थित र दर्शकमैत्री बनाउन त्रिवि अन्तर्राष्ट्रिय क्रिकेट मैदानमा पूर्वाधार तथा सुविधासमेत थपिएका छन् । यसपटक दुई हजार दर्शक अट्ने छानासहितको सिट, एलईडी स्कोरबोर्ड, डिजिटल बाउन्ड्री बोर्ड र मिडिया सेन्टरजस्ता सुविधा थप गरिएको छ ।
नयाँ प्रविधि, पूर्वाधार र विदेशी खेलाडीको सहभागितासहित सुरु हुन लागेको एनपीएलको तेस्रो संस्करणले नेपाली क्रिकेटको विकासमा थप योगदान पुर्याउने अपेक्षा गरिएको छ ।
